2012 jyly Qazaqstanda qylmystar 39,1 paıyzǵa kóp jasaldy - Bas prokýratýranyń qorytyndysy

ASTANA. 10 qańtar. QazAqparat - 2012 jyldyń 12 aıynda elimizdegi tirkelgen qylmystar deńgeıi 2011 jyldyń osyndaı kezeńimen salystyrǵanda 39,1 paıyzǵa (206 801-den 287 681-ge) ósken.

Bul týraly QR Bas prokýratýrasy Quqyqtyq statıstıka jáne arnaıy esepke alý jónindegi komıtettiń baspasóz qyzmetinen habarlandy.

«Máselen, urlyq 46,7 paıyzǵa (121 617-den 178 461-ge), buzaqylyq 63,1 paıyzǵa (10 650-den 17 325-ke), alaıaqtyq 50,3 paıyzǵa ( 15 059-dan 22 638-ge), tonaý 11,8 paıyzǵa (18 117-den 20 259-ǵa) artqan. Qylmystardyń bul túrleri jalpy tirkelgen qylmystylyqtyń negizgi bóligin - 83 paıyzyn quraıdy. Qylmystyń bulaısha ósýi jalpy alyp qaraǵanda túsinikti, óıtkeni olar buryn dástúrli túrde jasyrylyp kelgen qylmystar esebinen bolyp otyr», - delingen baspasóz habarlamasynda. Qylmystardyń bul túrleri jalpy tirkelgen qylmystylyqtyń negizgi bóligin - 83 paıyzyn quraıdy

Budan bólek, qylmystardyń quramyndaǵy asa aýyr qylmystar úlesi - 1,1 paıyzdy (3081), aýyr qylmystar - 10,7 paıyzdy (30 369), aýyrlyǵy ortasha qylmystar - 79,4 paıyzdy (288 444), aýyr emes qylmystar 8,9 paıyzdy (25 460) quraǵan.

«Bul rette, jalpy alǵanda elimizdegi qylmystylyq ahýaly ýshyqqan joq, qaıta onyń ishinde kisi óltirý 10,8 paıyzǵa tómendedi», - delingen baspasóz habarlamasynda.

Osylaısha, prokýratýranyń habarlaýynsha, qylmystylyqtyń ósýi elimizdiń barlyq óńirlerinde baıqalǵan. Muny osy jyldyń 1 qańtarynan bastap quqyq qorǵaý organdarynda ótinishter men habarlamalardyń barlyq túrlerin biryńǵaı tirkeýdiń engizilýimen, sondaı-aq qylmystardyń, onyń ishinde kórsetkish qýýǵa, soǵan oraı qylmystardy jasyrýǵa alyp keletin ortasha jáne aýyr emes qylmystardyń jalpy ashylýyna burynǵysha baǵa berýden bas tartýmen túsindirýge bolady. Sóıtip, tirkeýdiń ashyqtyǵy men kórsetkish qýýǵa múddeliliktiń joqtyǵy qylmysty tirkeýdiń shynaıylyǵyn qamtamasyz etip, qylmystylyq úderisine áser etetin alǵysharttar jıyntyǵyn ashyp kórsetti.