2012 jyly Qazaqstanda 8 medıtsınalyq nysan paıdalanýǵa beriledi - S.Qaıyrbekova
ASTANA. 5 maýsym. QazAqparat - Aǵymdaǵy jyly 8 densaýlyq nysany paıdalanýǵa beriledi.
Bul týraly búgin Úkimet otyrysynda QR Densaýlyq saqtaý mınıstri Salıdat Qaıyrbekova aıtty.
«100 aýrýhana» baǵdarlamasy aıasynda 103 nysan, onyń ishinde jergilikti mańyzdaǵy - 99, respýblıkalyq mańyzdaǵy 4 nysan salý kózdelgen. Qazirgi kúni jalpy quny 153,5 mlrd. teńgeni quraıtyn 60 densaýlyq saqtaý nysany salyndy. Olardyń ishinde 22 aýrýhana, 5 týberkýlezge qarsy dıspanser, 8 qan ortalyǵy, 2 perınataldy ortalyq jáne 23 emhana bar. Joba Atyraý, Pavlodar oblystarynda jáne Almaty qalasynda tolyǵymen júzege asyryldy»,- dedi ol.
Mınıstrdiń atap ótýinshe, aǵymdaǵy jyly 8 nysannyń qurylysyn aıaqtaý josparlanǵan. Respýblıkalyq mańyzdaǵy 2 nysannyń qurylysyn memlekettik-jeke áriptestik tetikterin paıdalaný arqyly júzege asyrý josparlanýda.
«Jobany odan ári júzege asyrý maqsatynda Densaýlyq saqtaý mınıstrligimen Qarjy, Ekonomıkalyq damý jáne saýda mıınstrlikterine 2013-2015 jyldarǵa arnalǵan bıýdjettik ótinimder quramyna qosymsha jalpy somasy 109,2 mlrd. teńge qarjy bólý týraly usynys engizdi», - dedi S.Qaıyrbekova.
Onyń atap ótýinshe, mınıstrlik surap otyrǵan bul qarajat 33 nysannyń qurylysyn aıaqtaýǵa jumsalatyn bolady. Atalǵan nysandardyń 10-yn - 2013 jyly, 19-yn - 2014 jyly, al 4-eýin 2015 jyly aıaqtaý josparlanǵan.
