2012 jyly eńbek ónimdiligin joǵarylatý boıynsha kórsetkishke qol jetkize almadyq - Aýyl sharýashylyǵy mınıstri
ASTANA. 5 naýryz. QazAqparat - Qazaqstan ótken jyly aýyl sharýashylyǵy salasyndaǵy eńbek ónimdiligin joǵarylatý boıynsha kórsetkishke qol jetkize almady.
Bul týraly búgin «Nur Otan» HDP-nyń saılaýaldy tuǵyrnamasynyń oryndalý máselesine arnalǵan Úkimettiń selektorlyq rejimdegi otyrysynda QR Aýyl sharýashylyǵy mınıstri Asyljan Mamytbekov málim etti.
Mıınstrdiń atap ótýinshe, aldyn ala málimetterge sáıkes 2012 jyldyń qańtar-qyrkúıek aılarynda aýyl ónerkásibi kesheniniń jalpy qosylǵan quny 109 paıyzǵa ulǵaıǵan. Al jospar 103,9 paıyz bolatyn.
«Ótken jyly qýańshylyqtyń saldarynan jalpy aýyl sharýashylyǵy ónimniń tómendegenin eskersek, aýyl sharýashylyǵynyń eńbek ónimdiligin joǵarylatý boıynsha kórsetkishke qol jetkize almadyq. Ótken jyl boıynsha ol 3 myń AQSh dollaryna boljanyp otyr. Áli naqty málimetter joq. Jospar 4,2 myń AQSh dollary bolatyn», - dedi A.Mamytbekov.
Onyń atap ótýinshe, jalpy eksporttyń kólemindegi agrarlyq sala eksportynyń úlesi jyldyq jospar boıynsha 5,4 paıyz kóleminde belgilengen. Al bul kórsetkish 2012 jyldyń qańtar-qarasha aılarynda 3,4 paıyzdy quraǵan. «Bul kórsetkish boıynsha da josparǵa qol jetkizbeý qaýpi bar», - dedi ol.
