2012 jyly elordalyq oqýshylar zııatkerlik saıystarda 85 medal ıelendi
ASTANA. 24 qańtar. QazAqparat - Halyqaralyq yntymaqtastyqty damytý jáne halyqaralyq dárejede Qazaqstan Respýblıkasy ımıdjin qalyptastyrý maqsatynda Astana qalasy bilim berý mekemeleriniń oqýshylary 2012 jyly Úndistan, Brazılııa, Reseı, Qytaı, Rýmynııa, Kıpr, Grýzııa, Túrkııa elderinde ótken 15 halyqaralyq reıtıngtik olımpıada men ǵylymı baıqaýlarǵa qatysty, - dep habarlaıdy astana.kz saıtyna qalalyq bilim basqarmasynan.
Qorytyndysynda Astana qalasynyń mektep oqýshylary 85 medalge ıe boldy. Olardyń: 14-i - altyn, 35-i - kúmis jáne 36-sy - qola.
2012 jyly qazan aıynda Brazılııanyń Novogambýrg qalasynda jalpy bilim beretin pánderden ótken XXVII «Mostratec» halyqaralyq ǵylymı jobalar jármeńkesinde Qazaqstan komandasynyń namysyn qorǵaǵan 25 oqýshymyz 5 altyn, 7 kúmis medal oljalady. Ǵylymı joba jármeńkesine 50 memleketten 1500 oqýshy qatysty.
Basqarmanyń málimetine sáıkes, №60 mektep-lıtseıiniń oqýshysy Aqjan Joldymuratova jáne daryndy er balalarǵa arnalǵan qazaq - túrik lıtseı- ınternatynyń oqýshylary -Abaı Qojabergenov, Danel Arapov, Nurlan Álisher, Aıdar Jetenovtiń ǵylymı jumystary eń úzdik joba retinde tanylyp, 2013 jyly Argentınada ótetin halyqaralyq ǵylymı jobalar konkýrsyna qatysýǵa joldama aldy.
Astana qalasynyń oqýshylar komandasy respýblıkalyq ǵylymı jobalar konkýrsy men respýblıkalyq olımpıadada jalpy komandalyq І orynǵa jáne «Jyldyń úzdik komandasy» ataǵyna ıe boldy, - delingen málimdemede.
