2012 jyly elimizdiń 12 aımaǵynan 537 bilim mekemeleri elektrondy oqytýǵa kóshti
ALMATY. 1 aqpan. QazAqparat - Álemdegi damyǵan elderdiń 80 paıyzy bilim júıelerin elektrondy oqytýǵa kóshire bastady. Bilim berý úrdisin avtomattandyrý ıaǵnı, kez kelgen jerden oqýǵa múmkindik týǵyzý, kez-kelgen aqparatty tez alýǵa baǵyttalǵan bul úrdis HH ǵasyrdyń ekinshi jartysynan bastap ár elde ártúrli jaǵdaıda, ártúrli mazunda bastaldy.
«Órleý» biliktilikti arttyrý ulttyq ortalyǵy» AQ fılıalynyń Qazaqstan Respýblıkasy bilim berý júıesiniń basshy jáne ǵylymı-pedagogıkalyq kadrlary biliktiligin arttyratyn respýblıkalyq ınstıtýtynyń aǵa oqytýshysy Janar Jartynovanyń aıtýynsha, sońǵy eki jylda elektrondy oqytý júıesi Qazaqstan mektepterinde de júzege asa bastady. Ol 2011 jyly bul úrdis Astana, Almaty qalalary men Qaraǵandy oblysyndaǵy 44 bilim mekemelerinde pılottyq joba retinde bastalǵan bolatyn. 2012 jyly elektrondy oqytýǵa elimizdiń 12 aımaǵynan 537 bilim mekemeleri kóshti.
«Árıne elektrondy oqytý barlyq máselelerdi sheshe almaıdy. Onyń ústine elektrondy oqytýǵa kóshken bilim oshaqtarynyń jumys nátıjesin zerdeleý, saraptaý, bul máselege baılanysty jańa problemalardyń týyndaǵanyn kórsetýde. Demek, biz buǵan deıingi qol jetkizgen jetistikterimizge masattanbaı, bul baǵyttaǵy bilimimizdi, tájirıbemizdi únemi jetildirip otyrýymyz kerek. Taǵy da bir eskeretin másele, elektrondyq oqytý júıesine baılanysty basqa elderdiń tájirıbesin únemi qadaǵalap otyrý», - deıdi J.Jartynova. Janar Álibekqyzynyń sózine qaraǵanda, 22-25 qańtar kúnderi QR Bilim berý júıesiniń basshy jáne ǵylymı-pedagogıkalyq kadrlary biliktiligin arttyratyn respýblıkalyq ınstıtýtynda Ońtústik Koreıanyń Korea National Open University professory Han Te Inniń qatysýymen "Trends of e-learning" atty taqyrypta halyqaralyq semınar ótti. 105 pedagog qatysqan bul shara kezinde Aqparatyq tehnologııa jáne e-Learning, e-Learning standarttary, e-Learning 2.0 jáne birlesken ujymdyq sana tehnologııalary, dızaın nusqaýlyǵy, SMART Learning jáne Úzdik kontent jáne t.b. máseleler boıynsha dárister oqylyp, trenıngter júrgizilip, dóńgelek ústel jıyndary uıymdastyryldy.
