2012 jyly densaýlyq saqtaý salasynyń jumysy azamattarymyzdyń ómir súrý uzaqtyǵyna baǵyttaldy - S.Qaıyrbekova
ASTANA 18 aqpan. QazAqparat - Qazaqstan azamattarynyń ómir súrý uzaqtyǵy byltyr 0,59 jasqa ulǵaıdy. Bul týraly búgin Parlament Májilisinde densaýlyq saqtaý salasynyń damý máselelerine arnalǵan Úkimet saǵatynda málim boldy.
Jıyn barysynda negizgi baıandama jasaǵan Densaýlyq saqtaý mınıstri Salıdat Qaıyrbekova 2012 jyldy qorytyndylaı kele, salanyń basty kórsetkishi - azamattardyń ómir súrý uzaqtyǵyna baǵyttalǵanyn atap ótti.
Mınıstrdiń aıtýynsha, «Salamatty Qazaqstan» baǵdarlamasy aıasynda tıimdi is-sharalardyń der kezinde qabyldaný nátıjesinde el azamattarynyń ómir súrý uzaqtyǵy 0,59 jasqa, ıaǵnı 2011 jylǵy 69,01 jastan 2012 jyly 69,6 jasqa ulǵaıǵan.
«Sońǵy 3 jyl ishinde elimizde analar ólimi 3,7 ese, náresteler ólim-jitimi 25 paıyzǵa, al qan aınalymy aýrýlarynan bolatyn ólim-jitim kórsetkishi 20 paıyzǵa tómendedi», - dedi mınıstr.
