2012 jyly aýyl halqy úshin 86 medıtsınalyq mekeme salynyp, paıdalanýǵa berildi
ASTANA. 18 aqpan. QazAqparat - Tek 2012 jyldyń ózinde elimizdiń aýyldarynda 86 medıtsınalyq mekeme salynyp, paıdalanýǵa berildi. Bul týraly búgin densaýlyq saqtaý salasynyń damýy men keleshek perspektıvalaryna arnalǵan Parlament Májilisindegi Úkimet saǵatynda málim boldy.
Densaýlyq saqtaý mınıstrliginiń málimetterine qaraǵanda, aýyldaǵy densaýlyq saqtaý nysandaryn materıaldyq-tehnıkalyq jaǵynan nyǵaıtý jumystary byltyrǵy jyly da qarqyndy atqarylǵan. Máselen, tek sońǵy 3 jyldyń ishinde aýyldardaǵy emdeý uıymdaryna 5000-ǵa tarta medıtsınalyq qural-jabdyqtar satyp alynǵan. Budan bólek, tek 2012 jyldyń ózinde aýyl halqy úshin 86 medıtsınalyq mekeme salynyp, paıdalanýǵa berilgen.
«Memleket basshysynyń tapsyrmasyna sáıkes, aýyl turǵyndaryn qoljetimdi medıtsınalyq kómekpen qamtamasyz etýde negizgi salmaq kólik medıtsınasyna - jyljymaly medıtsınalyq keshenderge, «medıtsınalyq poıyzdarǵa» túsip otyr. Bul baǵytta ótken jyly 600 myńǵa tarta aýyl halqy bilikti dárigerlerdiń qaraýynda boldy. 1,5 mln.-ǵa tarta zerthanalyq-dıagnostıkalyq qyzmetter kórsetilip, beıindik keńester berildi», - delingen mınıstrlik taratqan málimetterde.
