2012 jyly ana men bala ólimin azaıtý baǵytyndaǵy jumystar jalǵasady
ASTANA. 9 naýryz. QazAqparat - «Salamatty Qazaqstan» Memlekettik densaýlyq saqtaýdy damytý baǵdarlamasynda kózdelgen júıeli is-sharalardyń arqasynda 2011 jyly ana men bala ólim-jitiminiń kórsetkishi birshama azaıdy.
Aǵymdaǵy jyly da osy baǵytty júzege asyrý basymdyqqa ıe bolyp tabylady, dep habarlady pm.kz saıty.
«Qazir «Salamatty Qazaqstan-2015» memlekettik baǵdarlamasy júzege asyrylýda. Densaýlyq saqtaý salasy sapaly túrde damyp keledi. Halyqtyń densaýlyǵy jaqsardy. Bala týý kóbeıip, azamattardyń ómir súrý jasy uzardy», - dep málim etti Elbasy N.Á.Nazarbaev «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna arnaǵan bıylǵy Joldaýynda.
QR Úkimeti halyq densaýlyǵyn jaqsartý úshin keshendi is-sharalardy júzege asyrýdy jalǵastyrady. Densaýlyq saqtaý mınıstrliginiń 2012 jylǵy jumysy ana men sábı ólim-jitiminiń kórsetkishin tómendetýge jumyldyrylatyn bolady, sebebi ana men bala ólimin azaıtý - álemdegi básekege qabiletti 50 eldiń qataryna qosylýǵa qajetti sharttardyń biri.
Densaýlyq saqtaý mınıstrliginiń málimetinshe, 2011 jyly aldyn ala qaraý sharalarynyń aıasynda 1 mln. áıel men 4,2 mln. bala tekserýden ótken.
Sonymen qatar, perzenthanalardy materıaldyq-tehnıkalyq turǵyda jabdyqtaý kúsheıtilip, perınataldy kómek aımaqtandyryldy. Qazaqstanda halyqaralyq tehnologııalardy oqytatyn 34 ortalyq qurylyp, olarda 8 myń dáriger men biliktiligi ortasha medıtsınalyq qyzmetkerler oqýdan ótken.
Buǵan qosa, respýblıkamyzda balalarǵa arnalǵan kepildendirilgen tegin medıtsınalyq kómek kólemi keńeıdi.
Keńestik kezeńnen keıingi keńistikte Qazaqstan alǵash ret balalardy pnevmokokk ınfektsııasyna qarsy egýdi qolǵa aldy. Búgingi tańda elimizdiń 4 óńirinde 260 myńnan astam balaǵa osy vaktsına egilgen. 2015 jylǵa deıin balalardy vaktsınalaý saty-satysymen búkil respýblıkany qamtıtyn bolady.
Elimizde jańa týylǵan nárestelerge kórsetiletin hırýrgııa qyzmeti belsendi túrde alǵa basyp keledi. 2011 jyldyń ekinshi jartyjyldyǵynda jańa týylǵan nárestelerdiń kemtarlyǵyn anyqtaý jáne soǵan sáıkes, olardyń ómirin saqtap qalý úshin jasalǵan sátti otalardyń sany 1,5 esege kóbeıgen.
Qolǵa alynǵan sharalar ana men bala ólimin azaıtýǵa múmkindik týǵyzdy. Densaýlyq saqtaý mınıstrliginiń málimetteri boıynsha, 2011 jyly ana ólimi 1,5 esege, al sábı ólimi 9,9 paıyzǵa tómendegen. Sondaı-aq sábı óliminiń azaıýy elimizdiń barlyq óńirlerinde kórinis tapty desek bolady.
