2012 jyly 537 bilim oshaǵyna e-learning júıesi engiziledi
ASTANA. 22 maýsym. QazAqparat - «E-learning» baǵdarlamasy elektrondyq oqytý formatynda bilim alý qaǵıdasyna negizdelgen jańa bilim modeli bolyp tabylady. Byltyr bul júıege ilki rejımde 44 bilim oshaǵy qosylsa, jańa oqý jylynda e-learning baǵdarlamasy elimizdiń 537 oqý mekemesine engizilgeli otyr, dep habarlady pm.kz saıty.
E-learning elektrondy oqytý baǵdarlamasy Elbasynyń tapsyrmasy boıynsha QR Úkimeti 2010 jyldan bastap iske asyryp kele jatqan Bilim berýdi damytý memlekettik baǵdarlamasynyń mańyzdy baǵyttarynyń biri bolyp tabylady.
Jańa oqý jylynda elektrondyq oqytý júıesi 537 orta, tehnıkalyq jáne kásiptik bilim oshaqtaryna engiziledi, sonyń arqasynda bilim mekemeleri ótkizý múmkindigi 4-10 Mbıt/sek jyldamdyqty quraıtyn Internet jelisimen qamtamasyz etiledi.
«Orta bilim berý júıesinde e-learning jobasyn damytý nátıjeli jalǵasýda, bul jańa modelge taǵy 537 mekeme qosylǵaly otyr. Álemdik tájirıbe men ilki jobanyń nátıjesine júrgizilgen taldaýlardyń negizinde e-learning tujyrymdamasy ári qaraı jetildirilýde. 2020 jylǵa beıin elimizdegi mektepterdiń 90 paıyzy osynaý jobamen qamtylatyn bolady»,- dep atap kórsetti bilim jáne ǵylym mınıstri Baqytjan Jumaǵulov Parlament Májilisinde «Úkimet saǵatynda» sóılegen sózinde.
Jańa júıe engiziletin mektepterde symsyz Wi-Fi jelisi jumys isteıtin bolady, zamanaýı derbes kompıýterler, noýtbýkter, monobloktar, ınteraktıvtik jáne mýltımedııalyq proektorlar, planshetter men klassmeıtter ornatylady.
Qazirgi tańda Qazaqstanda 16 oqýshyǵa 1 kompıýterden keledi. Mektepterdiń 98 paıyzy, onyń ishinde aýyl mektepteriniń 97 paıyzy Internetke qosylǵan, 43,1 paıyzy keńtarmaqty Internetpen qamtylǵan. Oǵan qosa, 459 mektep lıngafon jáne mýltımedııalyq kabınettermen jaraqtalǵan.
Elektrondyq jańa júıeniń ereksheligi sol, ol alys aýyldardaǵy bilim berýdiń sapasyn arttyrýǵa, qala men aýyldaǵy bilimniń deńgeıin teńestirýge múmkindik beredi.
Álemdik tájirıbe kórsetip otyrǵandaı, e-learning júıesi bilim berýdi jańǵyrtýdyń negizgi quraldarynyń biri bolyp tabylady. Ońtústik Koreıada, Fınlıandııa men Irlandııada elektrondyq oqytýdyń arnaıy ulttyq baǵdarlamasy iske asyrylady. Frantsııada aqparattyq-kommýnıkatsııalyq tehnologııalar bilim berý úrdisiniń barlyq salasyna, balabaqshadan bastap eresekterdi oqytýǵa deıin engizilde. AQSh, Ulybrıtanııa, Avstralııa, Jańa Zelandııa jáne Kanada elderinde elektrondyq oqytý júıesi kúndelikti tájirıbege engizgeli qashan.
Buǵan deıin habarlaǵandaı, e-learning júıesin ári qaraı yqpaldastyrý úshin 5-11 synyptarǵa arnalǵan «Qazaqstan tarıhy» páni boıynsha qazaq jáne orys tilderinde 468 sandyq bilim resýrsy ázirlenip otyr. Oǵan qosa, «Nazarbaev Zııatkerlik mektepteri» AQ-ynda e-learning baǵdarlamasy boıynsha orta mektepterdiń oqýshylary men muǵalimderi úshin onlaın-semınarlar men sabaqtar ótkizilýde.
E-learning - búginde álemniń kóptegen elderiniń bilim berý júıelerine ekpindi engizilip otyrǵan oqytýdyń ilgerindi ádisi. Elektrondyq oqytýdyń osynaý aýqymdy jobasyn iske asyrý Qazaqstannyń bilim berý júıesin ári qaraı damytýdaǵy mańyzdy qadam bolyp tabylady.
