2012 jyly 16 ınsýlt ortalyǵy ashylady
ASTANA. 16 sáýir. QazAqparat - 2012 jyldyń І toqsanynda qan aınalymy júıesi aýrýlarynan bolǵan ólim-jitim ótken jyldyń sáıkes kezeńindegi kórsetkishten 42 paıyzǵa tómendedi,
dep habarlady Densaýlyq saqtaý mınıstrliginiń baspasóz qyzmetinen.
Habarlamada atap kórsetilgendeı, qan aınalymy júıesi aýrýlarynan bolǵan ólim-jitimniń 40 paıyzyn ınfarkt aýrýy alyp otyr.
Búginde elimizde ınterventsııalyq jáne kardıohırýrgııalyq qyzmetterdi damytýǵa barlyq jaǵdaı jasalyp jatqanyn buǵan deıin aıtyp ótken bolatynbyz. 2011 jyldan bastap Almatyda Ulttyq ǵylymı kardıohırýrgııalyq ortalyq, Perınataldyq ortalyq jumys isteı bastady.
«Qazirgi tańda elimizde eresekter men balalardyń júrekterine operatsııa jasaýǵa arnalǵan operatsııa bólmelerine degen suranys tolyq qanaǵattandyrylyp otyr. Qazaqstan boıynsha aǵymdaǵy jyldyń alǵashqy eki aıynda ashyq júrekke 1313 operatsııa jasaldy, bul 2011 jyldyń sáıkes kezeńindegi kórsetkishten 55 paıyzǵa kóp. Jáne onyń ishinde balalarǵa 577 operatsııa jasaldy»,- delingen mınıstrliktiń habarlamasynda.
Júrek-qan tamyrlary aýrýlarynan bolatyn ólim-jitimdi azaıtý baǵytynda ınsýlt ortalyqtary uıymdastyrylyp jatqanyn aıta ketý kerek. 2011 jyly respýblıkalyq bıýdjettiń esebinen elimizdiń 6 oblysynda 8 ınsýlt ortalyǵy ashyldy, 6 óńirdiń medıtsınalyq mekemelerinde 7 ınsýlt ortalyǵy standartqa saı jaraqtaldy.
Al 2012 jyly 12 óńirde 16 ınsýlt ortalyǵy, 2013 jyly - 15 oblysta 24 ınsýlt ortalyǵy ashylady.
2012 jyldyń І toqsanynda Insýlt ortalyqtarynyń jumysyn uıymdastyrý jáne medıtsına qyzmetkerlerin osyndaı naýqastardy emdeýge úıretý jónindegi Jol kartasy jasaldy. Oǵan qosa, júrek-qan tamyrlary aýrýlarymen aýyratyn naýqastardyń regıstrin qurý jónindegi baǵdarlama ázirlenýde.
