2012 jyly 12 Zııatkerlik mekteptiń qurylysy aıaqtalady
ASTANA. 13 aqpan. QazAqparat - 2012 jyly 12 «Nazarbaev Zııatkerlik mektebiniń» qurylysy aıaqtalady. Qazirgi ýaqytta elimizde 6 Zııatkerlik mektep jumys isteıdi, dep habarlaıdy pm.kz saıty.
«2012 jyly Pavlodar, Petropavl, Almaty, Qaraǵandy, Shymkent, Aqtaý, Qostanaı, Qyzylorda, Astana qalalarynda 12 Zııatkerlik mekteptiń qurylysyn aıaqtaý josparlanýda. Daıyn bolǵan mektepter birtindep iske qosylady», - delingen «Nazarbaev Zııatkerlik mektepteri» uıymynyń baspasóz qyzmetiniń habarlamasynda.
2011 jyly Oral qalasynda Zııatkerlik mekteptiń qurylysy jalǵasty. Aqtóbe, Atyraý, Taraz, Shymkent, Petropavl, Almaty, Pavlodar, Qaraǵandy, Qostanaı qalalarynda 10 Zııatkerlik mekteptiń qurylysy bastaldy. Qazirgi tańda elimizde Astana, Taldyqorǵan, Kókshetaý, Semeı, Óskemen qalalarynda 6 «Zııatkerlik mektep» jumys isteıdi.
Aıta ketý kerek, 2011 jyldyń 1 qyrkúıeginde «Nazarbaev Zııatkerlik mektepterinde» jalpy bilim beretin mektepterdiń muǵalimderine arnalǵan onlaın-semınarlar jáne oqýshylarǵa arnalǵan onlaın-sabaqtar ótkizile bastady.
«Bul jobalar mektepterdegi sabaq berýdiń sapasyn arttyrýǵa baǵyttalyp otyr. Oqýshylar úshin matematıka, fızıka, hımııa, bıologııa pánderi boıynsha sabaqtar ótkizilse, muǵalimder úshin «Synı baǵalaý» taqyrybyna arnalǵan semınarlar ótkizilýde», - delingen habarlamada.
2011 jyly 160 onlaın-sabaq jáne 17 onlaın-semınar ótkizildi. 2012-2013 oqý jylynda da taǵy birneshe taqyrypqa arnalǵan onlaın-semınarlar ótkizý josparlanýda.
Taǵy bir aıta ketetin jaıt, Zııatkerlik mektep oqýshylarynyń 18,9 paıyzy 2010-2011 oqý jylynyń qorytyndysy boıynsha túrli halyqaralyq (Frantsııa, Koreıa, Reseı, Kıpr) jáne respýblıkalyq olımpıadalardyń, ǵylymı jobalar jarystary men konkýrstardyń júldegerleri atandy. Halyqaralyq jáne respýblıkalyq konkýrstardyń jeńimpazdarynyń eń kóbi Astana (225 oqýshy) jáne Kókshetaý (216 oqýshy) qalalaryndaǵy Zııatkerlik mektepterdiń oqýshylary bolyp tabylady.
