2012 jyldyń qańtar-sáýir aılarynda qurylys ındýstrııasynyń óndiris kólemi 11,9 paıyzǵa artty
ASTANA. 9 maýsym. QazAqparat - 2012 jyldyń 4 aıynda qurylys ındýstrııasynyń jeke ındeks kólemi 111,9 paıyzdy qurady, dep habarlaıdy pm.kz saıty QR Indýstrııa jáne jańa tehnologııalar mınıstrliginiń baspasóz qyzmetine silteme jasap.
«Jalpy respýblıka boıynsha, qurylys ındýstrııasy óndirisiniń jeke kólem ındeksi 111,9 paıyzdy, óndiris kólemi 74,1 mlrd. teńgeni quraǵan», - delingen vedomstvo habarlamasynda.
Jeke kólem ındeksiniń ósimi boıynsha Jambyl, Qostanaı jáne Aqtóbe oblystary alda keledi.
QR Indýstrııa jáne jańa tehnologııalar mınıstrliginiń aqparatyna súıensek, Jambyl oblysy «Myńaral Tas kompanııasy» JShS tsement óndirý zaýytynyń óndiris esebinen osy ósimge qol jetkizip otyr. 2011 jyly zaýyt 40 paıyzdyq qýattylyqpen 5 mlrd. teńgeniń ónimin shyǵarǵan. Jospar boıynsha, kásiporyn bıyl tolyq qýatyna shyǵady.
