2012 jyldyń eń úzdik kóligi belgili boldy
ASTANA. 6 sáýir. QazAqparat - Nıý-Iorkte 2012 jyldyń eń úzdik kóligi (2012 World Car of the Year) tańdaldy.
Úshinshi serııadaǵy BMW jáne Porsche 911 markaly kólikterdiń shańyn qaptyryp ozyp ketken, eń úzdik kólik ataǵyna qalalyq shaǵyn lıtrajdy Volkswagen Up! ıe boldy. Jalpy alǵanda bul ataqqa 34 kólik talasty, dep habarlady Lenta. rý.
World Car of the Year saıtynda atalyp ótilgendeı, 2012 jyly eń úzdik temir tulpardyń ataǵyna ıe bolǵan Volkswagen úshin bul jeńis baıqaýdyń tarıhynda úshinshi qaıtalanyp otyr.
Lıtrlik qozǵaltqyshpen jabdyqtalǵan Volkswagen Up! kóliginiń qýattylyǵy 74 attyń kúshine para-par. Ol 2011 jyldyń jeltoqsan aıynan bastap Bratıslavtyń Volkswagen zaýytynan shyǵaryla bastady. Bul kólik Eýropada jaqsy baǵalanady, degenmen ol AQSh pen Reseıdiń naryǵyna áli túspegen.
Synshylar eń úzdik kólikti anyqtaý turǵysynda kóliktiń basqarylýyn, beldiktiń sapasyn, qozǵaltqyshtyń únemdiligi men materıaldardyń sapasyn jáne qurastyrylýyn baǵalady.
Bas júldeden keıin turǵan, Lamborghini Aventador LP 700-4 ı McLaren MP4-12C markaly kólikten ozǵan Porsche 911 temir tulpary óz kezeginde jyldyń eń úzdik sport kóligi atandy.
Baıqaýdyń qazylar alqasyna álemniń 25 elin tanystyratyn jetekshi kólik basylymdarynyń 64 jýrnalısi qatysty.
