2012 jyldyń basynan beri elimiz boıynsha 3 myń avtokólik birden tehnıkalyq baıqaýdan óte almady
ASTANA. 17 qańtar. QazAqparat /Rýslan Ǵabbasov/ - Jyl basynan beri elimiz boıynsha 3 myń avtokólik birden tehnıkalyq baıqaýdan óte almady. Bul týraly búgin Astanada ótken baspasóz máslıhatynda Kólik jáne kommýnıkatsııa vıtse-mınıstri Asylbek Dúısebaev aıtty.
Esterińizge sala keteıik, bıyldan bastap elimizde avtokólikter tehnıkalyq baıqaýdan tek jeke ortalyqtardan ótedi.
«Jyl basynan beri respýblıka boıynsha 10 myń avtokólik tekserilip, onyń 30 paıyzy birden tehnıkalyq baıqaýdan óte almady», - deıdi vıtse-mınıstr. Atap aıtqanda, kólikterdiń birden tehnıkalyq baıqaýdy eńsere almaýynyń negizgi sebepteri jaryq túsirý jabdyqtary men tejegish júıesiniń durys bolmaýynan tirkelip otyr.
Onyń paıymdaýynsha, jyl basynan beri árbir úshinshi kóliktiń tehnıkalyq baıqaýdan óte almaýy tehnıkalyq qadaǵalaýdyń jańa júıesiniń tıimdiligin kórsetip otyr. Bul birinshi kezekte joldaǵy kólik qozǵalysynyń qaýipsizdigine ońtaıly áser etpek.
