2012 jylda Qazaqstanda julyn maıyn aýystyrý operatsııalarynyń sany 20-ǵa deıin ósýi múmkin
ASTANA. 22 qyrkúıek. QazAqparat /Arman Asqarov/ - Memlekettiń búgingi myqty qoldaýy jalǵasatyn bolsa, kelesi jyly julyn maıyn aýystyrý operatsııalarynyń sany 20-ǵa deıin jetýi ábden múmkin.
Bul týraly búgin Astanada gematologııa máselelerine arnalǵan konferentsııada QR Densaýlyq saqtaý mınıstrliginiń shtattan tys bas gematology Irına Pıvovarova málim etti.
«Sońǵy eki jylda biz arnaıy baǵdarlamany qabyldap, bir jyldyń ishinde julyn maıyn aýystyrý boıynsha bes operatsııa jasadyq. Endi taǵy 4 transplantatsııany jasaıtyn josparymyz bar. Al memlekettiń búgingi myqty qoldaýy jalǵasatyn bolsa, kelesi jyly julyn maıyn aýystyrý operatsııalarynyń sany 20-ǵa deıin jetýi ábden múmkin. Bul jaqsy kórsetkish», - deıdi I.Pıvovarova.
Aıta keteıik, búginde Qazaqstanda gematologııa salasyndaǵy adam ólimi 14,2 paıyzdy qurap otyr. Bul álemdik kórsetkishten bes ese artyq.
