2012-2013 jyldarǵa arnalǵan bıýdjette etnıkalyq qazaqtardyń elimizge kóship kelip, beıimdelýi úshin 16 mlrd. teńge qarastyrylǵan
Búgin QR Parlamenti Májilisinde «Nur Otan» HDP Fraktsııasy janyndaǵy Áleýmettik keńestiń otyrysy barysynda Keńes tóraıymy Májilis depýtaty Aıtkúl Samaqova osylaı málim etti. Esterińizge sala keteıik, jıyn «Memlekettiń oralmandarǵa qyzmet túrlerine qol jetkizýdi qamtamasyz etý salasyndaǵy áleýmettik saıasaty» taqyrybynda ótken bolatyn.
Sóz arasynda A. Samaqova óz qandastaryn tarıhı Otanyna qaıtaryp otyrǵan Qazaqstannyń memlekettik saıasaty arqasynda oralmandarǵa birqatar mańyzdy áleýmettik kómekter kórsetilip otyrǵanyn tilge tıek etti. Máselen, Qazaqstanǵa oralǵan etnıkalyq qazaqtardyń jumysqa ornalasýyna, olardyń biliktiligin arttyrýǵa, jańa kásipterdi ıgerýlerine jaǵdaılar qaralǵan. Memlekettik jáne orys tilderin úırenýge tıisti sharalar qamtylady. Kásibı jáne joǵary oqý oryndaryna túsý úshin kvotalar da qarastyrylady. Tegin kepildendirilgen medıtsınalyq kómekter usynylady. Ataýly áleýmettik kómekter, járdemaqylar tólenedi. Baspanamen qamtýǵa qarajat bólinip, birretki járdemaqy tólenedi.
«Etnıkalyq qazaqtardyń tarıhı otanyna oralýyna, olardyń Qazaqstan jaǵdaıyna beıimdelýine jyl saıyn respýblıkalyq bıýdjet shyǵystary artyp keledi. Máselen, 2011 jyly bul maqsatqa 12 mlrd. teńgeden astam qarajat josparlanǵan. Al 2012-13 jyldarǵa bıýdjetten 16 mlrd. teńge qarastyrylady», - dedi Áleýmettik keńes tóraıymy Aıtkúl Samaqova. Onyń aıtýynsha, elge kelgen oralmandar da Qazaqstan ekonomıkasyna óz úlesterin qosyp jatyr. Máselen olardyń úshten ekisi óndiristiń ártúrli salalarynda qyzmet etse, árbir tórtinshisi aýyl sharýashylyǵynda eńbek etýde.
