2011 jyly Turǵyn úı-kommýnaldyq sharýashylyqty jańǵyrtý baǵdarlamasy aıasynda 600-ge jýyq turǵyn úı jóndeldi

Bul týraly búgin Astanada ótken jıyn barysynda «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ basqarma tóraǵasynyń orynbasary Erbolat Bóksikbaev málim etti.

Onyń habarlaýynsha, turǵyn úıdi jańǵyrtýdyń birinshi baǵyty boıynsha ótken jyly 99 úıdi qamtylsa, ekinshi baǵyt boıynsha 460 úı jóndeldi. Negizi, 2011-2015 jyldarǵa arnalǵan Turǵyn úı- kommýnaldyq sharýashylyqty jańǵyrtý baǵdarlamasyna sáıkes, kóppáterli turǵyn-úılerdiń jańǵyrtý jumysy eki baǵyt boıynsha júrgiziledi.

Birinshi baǵytqa sáıkes, respýblıkalyq bıýdjetten jergilikti atqarýshy organdarǵa, ıaǵnı ákimdikterge, qarjy bólingennen keıin, arnaıy áleýmettik-kásipkerlik korporatsııalar qurylyp, páter ıelenýshiler kooperatıvi men jumysty atqaratyn bas merdigermen kelisimshart rásimdeledi. Oǵan sáıkes, barlyq qurylys jumystarynyń 85 paıyzyn korporatsııalar tólese, qalǵan 15 paıyzy páter ıelenýshilerdiń qarajatyna atqarylady. Osydan keıin, belgilengen merzimniń ishinde úı turǵyndary arnaıy jınaq esep-shotyna aqsha salyp, kúrdeli jóndeýdiń barlyq shyǵyndaryn  óteıdi.

Ekinshi baǵyt boıynsha, el bıýdjetinen oblystyq ákimdikke 7 jylǵa 0,1 paıyzdyq mólsherlememen nesıe beriledi. Oblys ákimdigi ony qalalyq ákimdikke aýdarady. Sodan soń jóndeý jumystaryn atqaratyn memlekettik uıym qurylady. Ol óz kezeginde jekemenshik kompanııalardy tartyp, ákimdiktiń bergen nesıesin qaıtarady. Munda da páter ıelenýshi azamattar qarjynyń 15 paıyzyn tólep, artynan barlyq sommany tóleıdi. Al áleýmettik jaǵynan az qorǵalǵandar úshin arnaıy jeńildikter qarastyrylǵan.