2011 jyly Memlekettik turǵyn úı qorynan 436 astanalyq baspana aldy - I.Tasmaǵambetov
ASTANA. 9 jeltoqsan. QazAqparat /Gúlmıra Alıakparova/ - 2011 jyly 436 astanalyq Memlekettik turǵyn úı qorynan qoljetimdi baspanamen qamtamasyz etildi.
Bul týraly óziniń jeke blogynda turǵyndardyń saýalyna jaýap bergen elorda ákimi Imanǵalı Tasmaǵambetov aıtty.
Qala basshysynyń sózine qaraǵanda, Memlekettik turǵyn úı qorynan qoljetimdi baspanany 2009 jyly - 190, 2010 jyly 288 otbasy aldy. Al bıyl taǵy 436 astanalyq qonys toıyn toılady.
«Buǵan deıingi jyldary páterlerdi 50-ge jýyq azamat qana alǵanyn eskersek, qazir kezektiń jyljýynyń qarqyny jaman emes. Aldaǵy jyldary bul jumysty jalǵastyratyn bolamyz», - dep atap ótti I.Tasmaǵambetov.
Aıta keteıik, bıyl qoljetimdi baspanalar Turǵyn úı basqarmasyna 2003 jyly kezekke turǵandarǵa berildi.
Al turǵyndardyń biriniń: «Táýelsizdiktiń 20 jyldyq mereıtoıyna oraı úlestiriletin páterler sany kóp bola ma?», - degen saýalyna: «Astanada jumys isteıtin birqatar qurylys kompanııasy ózderiniń nysandaryn jeltoqsannyń sońyna deıin iske qosý nıetterin bildirgendikten, Táýelsizdiktiń 20 jyldyǵy qarsańynda úlestiriletin páterlerdiń naqty sanyn aıtý qıyn. Bul sandardy keıin, 2011 jyldyń qorytyndysyn jasaǵan kezde aıtamyn», - dep jaýap qaıyrdy.
