2011 jyly qysqy Azııa oıyndaryn ótkizý aldymyzda turǵan mańyzdy maqsattardyń biri - Týrızm jáne sport mınıstrligi
ASTANA. Jeltoqsannyń 14-i. QazAqparat /Rýslan Ǵabbasov/ - Azıadaǵa qatysý úshin kandıdat 156 sportshy irikteldi.
Bul týraly búgin Astanada QR Parlamenti Senatynyń depýtattarymen kezdesý kezinde Týrızm jáne sport mınıstri Temirhan Dosmuhambetov málim etti, dep habarlaıdy QazAqparat.
«Qazirgi kezde aldymyzda turǵan mańyzdy maqsattardyń biri-ol 2011 jyly Astana men Almaty qalalarynda qysqy Azııa oıyndaryn ótkizý»,-dedi mınıstr. Aldaǵy qysqy Azııa oıyndaryna 11 sport túrleri boıynsha daıyndyqtar júrip jatqanyna toqtalǵan ol, Azıadaǵa qatysý úshin kandıdat 156 sportshy iriktelingenin, sondaı-aq ulttyq qurama komandalarmen jumys isteý úshin 9 sheteldik jattyqtyrýshy men keńesshiler shaqyrylǵanyn jetkizdi.
Onyń aıtýynsha, olımpıadalyq sport túrlerinen respýblıkada Joǵary sport sheberliginiń 8 mektebi, olımpıadalyq rezervterdi daıarlaýdyń 17 ortalyǵy, sondaı-aq olımpıadalyq daıyndyqtyń 7 respýblıkalyq ortalyǵy jáne sporttaǵy daryndy balalarǵa arnalǵan 15 mektep-ınternattar jumys isteıdi.
«Ulttyq quramanyń tabysty shyǵýy men joǵary sporttyq nátıjege qol jetkizýi maqsatynda Olımpıada oıyndaryna qatysýǵa úmitkerler anyqtaldy»,-dedi mınıstr.
Onyń aıtýynsha, sonymen birge materıaldyq-tehnıkalyq bazany damytý boıynsha jedel sharalar qabyldanǵan jáne sportshylar men jattyqtyrýshylardy materıaldyq jaǵynan yntalandyrý máseleleri sheshildi.
Atap aıtqanda, Olımpıada oıyndarynda jaqsy nátıje kórsetken sportshylarǵa tólenetin birjolǵy materıaldyq aqynyń kólemi ósti. Altyn medal ıegeri men onyq jattyqtyrýshysy 250 myń AQSh dollary, kúmis júldeger men onyń jattyqtyrýshysy 150 myń AQSh dollary, sondaı-aq qola júlde boıynsha 75 myń AQSh dollary syıaqy alady.
