2011 jyly qylmystyq baptardyń dekrımınalızatsııasy negizinde 12 myńǵa tarta adam bostandyqqa shyǵarylýy múmkin
ASTANA. Qańtardyń 15-i. QazAqparat /Jasulan Amanbaıuly/ - 2011 jyly Qazaqstanda qylmystyq jazalardyń bir bóligin ákimshilik jaza túrine aýystyrý kózdelýde.
Búgin bul týraly «Penıtıtsıarlyq mekemelerdegi qoǵamdyq baqylaý: 2005-2009 jyldardaǵy qyzmetke baǵa berý, odan ári jetildirý boıynsha usynystar» atty taqyrypta ótken dóńgelek ústel barysynda Ádilet mınıstrligi Qylmystyq atqarý komıtetiniń tóraǵasy Meıram Aıýbaev málim etti, dep habarlaıdy QazAqparat.
M. Aıýbaevtiń aıtýynsha, elde 2011 jyly keıbir qylmystyq baptar boıynsha dekrımınalızatsııa júrgiziledi dep kútilýde. «Qylmystyq saıasat - bas bostandyǵynan aıyrýmen baılanysty emes jazalardy qoldanýǵa basymdyq beretin bolady. Qazirgi ýaqytta biz baptardy saralaý jumystaryn ótkizip, dekrımınalızatsııaǵa keletin baptardy anyqtap jatyrmyz. Bas bostandyǵynan aıyrý mekemelerine túsetin adamdardyń sany edáýir azaıady. Túrmelerde jazalaryn ótep júrgen adamdardyń sany boıynsha Qazaqstan álemdegi elderdiń arasynda 25-shi orynda. Dekrımınalızatsııa júrgizilgennen keıin bul kórsetkish birshama tómendeýi tıis», deıdi ol.
M. Aıýbaevtiń atap kórsetkenindeı, dekrımınalızatsııa bul keıbir qylmystyq baptardy ákimshilik baptarǵa aýystyrý bolyp tabylady. Sondyqtan buryndary qylmystyq baptar boıynsha sottalǵandardyń belgili bir kategorııasynda jazalary aýystyrylyp, bostandyqqa shyǵýy múmkin. «Búgingi tańda penıtıtsıarlyq mekemelerde jazalaryn ótep júrgenderdiń sany 63 myńdy qurap otyr. Dekrımınalızatsııadan keıin, 12 myń sottalǵandar bostandyqqa shyǵarylady», dedi M. Aıýbaev.
