2011 jyly qańtardyń 1-inen bastap bala asyrap alýshylarǵa 10 AEK mólsherinde járdemaqy tólenbek
ALMATY. Qazannyń 27-si. QazAqparat /Ádilet Musahaev/ - Úkimet tarapynan 2011 jyly qańtardyń 1-inen bastap óz januıalarynda jetim jáne ata-anasynyń qamqorynsyz qalǵan balalardy tárbıesine alǵan barlyq qamqorshylar men qorǵanshylarǵa balalardy asyraýǵa 10 AEK mólsherinde járdemaqy tólenedi.
Bul jaıynda búgin Almaty qalasy Balalardyń quqyqtaryn qorǵaý departamentiniń monıtorıng jáne aqparattyq-taldaý qyzmeti bóliminiń bastyǵy Zına Işenova arnaıy ótken baspasóz máslıhaty barysynda aıtty, dep habarlaıdy QazAqparat.
Z.Işenovanyń aıtýynsha, Qazaqstanda 42 myń jetim bala bar. Onyń 25 myńy qamqorshy januıalarynda tárbıelenýde, al 15 myńy áleýmettik mekemelerde, qalǵan 2 myńy patronattyq tárbıede. "Úkimet tarapynan kórsetiletin bul kómek jetim qalǵan sábılerdiń balalar úıinde emes, týǵan-týys nemese basqada da qamqorshy januıalarda tárbıelenýge kómektesedi dep oılaımyn. Kóbinde mundaı balalar zeınetaqymen kún kórip otyrǵan ata-apalarynyń qolyna kóship jatady, sondyqtan bul qarajattyń olarǵa kórsetetin áseri zor dep oılaımyn", deıdi Zına Işenova.
Almaty qalasy Bilim basqarmasynyń bas mamany Lázzat Birekeevanyń aıtýynsha, QR Neke jáne otbasy zańynyń 111-shi babyna sáıkes qorǵanshy jáne qamqorshylarǵa Almaty qalasy boıynsha 2011 jylǵa 211 mıllıon teńge qarastyrylsa, 2012 jylǵa 278 jáne 2013 jylǵa 309 mıllıon teńge bólinbek. "Almatyda jetim jáne ata-anasynyń qamqorlyǵynsyz qalǵan balalardyń 927-si qamqorshylar tárbıesine ótken. Al balalar úıinde 750-ge jýyq bala bar. Balalar úıinde tárbıelenip jatqan balalarǵa memleket tarapynan barlyq jaǵdaı jasalǵanymen olarǵa ata-ananyń, otbasynyń jylýy jetispeı jatady. Sondyqtan Úkimet ondaı balalardyń jaqyndarynyń januıalarynda tárbıelenýine basa nazar aýdaryp otyr", deıdi L.Birekeeva.
Atalmysh shara Almaty qalasy Balalardyń quqyqtaryn qorǵaý departamenti, «Shyǵarmashylyq bastamashy áıelder lıgasy» QB jáne taǵy basqa ÚEU-dyń uıymdastyrýymen ótti.
