2011 jyly elordada 17 jańa balabaqsha paıdalanýǵa beriledi - I. Tasmaǵambetov
ASTANA. 23 sáýir. QazAqparat /Jasulan Amanbaıuly/ - 2011 jyly elordada 17 jańa balabaqsha paıdalanýǵa beriledi. Bul týraly búgin jýrnalısterge Astana ákimi Imanǵalı Tasmaǵambetov málim etti.
Onyń aıtýynsha, byltyr Astanada jalpy 14 myń balaǵa arnalǵan 50 balabaqsha iske qosylǵan. Oǵan deıin qalada jalpy sany 12 myńǵa tarta balany qabyldaıtyn 38 balabaqsha bolǵandyǵyn eskersek, bul elordalyqtar úshin birshama úlken ıgilik.
«Búgingi kúni qalada 25 myń bala balabaqshaǵa ornalastyrylǵan. Bıylǵy jospardy alatyn bolsaq, 17 balabaqsha tapsyramyz dep otyrmyz. Aldymyzǵa qoıyp otyrǵan maqsatymyzdyń biri - eki-úsh jyl ishinde Astanada balabaqsha máselesin tolyqtaı sheshý»,-deıdi qala ákimi.
Qazirgi ýaqytta, qala basshysynyń atap ótkenindeı, Astanada 14 myń balaǵa balabaqsha orny jetispeıdi. «Ózderińiz túsinesizder, balabaqshalarmen 100 paıyzǵa qamtý eshqandaı jerde joq. Al eger biz 90 paıyzdyq qamtýdy jasaı alsaq, osynyń ózi bir tóbe bolar edi»,-dep atap kórsetti ol.
I. Tasmaǵambetovtyń aıtýynsha, jeke menshik balabaqshalardy salýǵa qatysty da ákimdik tarapynan eshbir tosqaýyl qoıylmaıdy. Qaıta olardyń qyzmeti quptalyp jatyr. «Bizdiń maqsatymyz - qaladaǵy mektepke deıingi balalar mekemelerimen qamtamasyz etý deńgeıin suranys kólemimen sáıkestendirý»,-dedi I. Tasmaǵambetov.
