2011 jyly elimizdiń aýrýhanalarynda 2,3 mln. naýqasqa statsıonarlyq kómek kórsetildi
ASTANA. 13 qańtar. QazAqparat - 2011 jyly elimizdiń aýrýhanalarynda 2,3 mln. naýqasqa statsıonarlyq kómek kórsetildi, olardyń úshten biri - aýyl turǵyndary,
dep habarlaıdy QR Densaýlyq saqtaý mınıstrliginiń baspasóz qyzmeti.
QR densaýlyq saqtaý salasyn damytýdyń 2011- 2015 jyldarǵa arnalǵan «Salamatty Qazaqstan» memlekettik baǵdarlamasy sheńberinde elimizde Biryńǵaı ulttyq densaýlyq saqtaý júıesi (BUDSJ) engizilýde.
Eki jyldyń ishinde statsıonarlyq sektor qyzmetin jetildirý baǵytynda keshendi jumystar atqaryldy. BUDSJ iske asyrý statsıonarlyq sektordaǵy tósek-oryndardyń naqty qajettiligin anyqtaýǵa, respýblıka boıynsha biregeı tarıf belgileýge, turǵyndardyń medıtsınalyq kómekke qoljetimdiligin qamtamasyz etýge múmkindik berdi.
«2011 jyly elimizdiń aýrýhanalarynda 2,3 mln. adam statsıonarlyq kómek aldy, olardyń úshten biri - aýyl turǵyndary. Statsıonardy erkin tańdaý qaǵıdasyn júzege asyrý nátıjesinde respýblıkanyń barlyq turǵyndary úshin medıtsınalyq kómektiń qoljetimdiligi artty. Josparly aýrýhanaǵa jatqyzý barysynda erkin tańdaý quqyǵyn ótken jyly 698 myń adam paıdalansa, olardyń 44% - aýyl turǵyndary. Azamattardyń 92% ózderi turatyn óńirlerde em alsa, 2% ózge aımaqtardy tańdaǵan. Al naýqastardyń 6%-na respýblıkalyq emhanalarda arnaýly kómek kórsetildi», - dep atap kórsetilgen baspasóz habarlamasynda.
Sonymen qatar, QR Densaýlyq saqtaý mınıstrliginiń Densaýlyq saqtaýdy damytý respýblıkalyq ortalyǵy halyqaralyq konsaltıngtik kompanııamen birlese otyryp, halyqaralyq standarttarǵa sáıkes 2020 jylǵa deıingi kezeńge arnalǵan aýrýhana sektoryn damytý strategııasynyń jobasyn ázirledi. Strategııa sheńberinde árbir óńirge arnalǵan, jergilikti atqarýshy organdarmen kelisilgen sheberlik-josparlary jasalýda.
