2011 jyly elde taza salmaqta 26,9 mln. tonna astyq jınaldy - Á.Smaıylov
ASTANA. 13 qańtar. QazAqparat /Jasulan Joldybaev/ - 2011 jyly Qazaqstanda taza salmaqta 26,9 mln. tonna astyq jınaldy.
Bul týraly búgin ótken brıfıngte QR Statıstıka agenttiginiń tóraǵasy Álıhan Smaıylov málim etti.
«2011 jyly Qazaqstan taza salmaqta 26,9 mln. tonna astyq jınady. Mundaı astyq kólemi sońǵy ret 1986 jyly jınalǵan. Alaıda, ol kezde egin alqaby byltyrǵy jylǵyǵa qaraǵanda 1,5 ese kóp boldy», - dedi vedomstvo basshysy.
Á. Smaıylovtyń atap ótkenindeı, ótken jyly Qazaqstanda bastyrylǵan eginniń ónimdilik kórsetkishi óte joǵary boldy. Ortasha esep boıynsha, bir gektar alqaptan 16, 9 tsentner astyq alyndy. «Mundaı ónimdilik sońǵy 60 jylda tirkelmegen», - dedi ol.
Jalpy, Statıstıka agenttiginiń málimetterine sáıkes, byltyr aýyl sharýashylyǵy jalpy óniminiń kólemi 2 trln. 256 mlrd. teńgeni qurap, 26,7 paıyzǵa artty.
