2011 jyly Dúnıejúzilik Bank reıtıngisiniń ınvestorlardy qorǵaý sanatynda Qazaqstan 34 satyǵa joǵarylady
ASTANA. 25 qańtar. QazAqparat - Dúnıejúzilik Banktiń «Doing Business» reıtıngisinde 2011 jyly Qazaqstan 47-nshi orynǵa ıe boldy, dep habarlaıdy pm.kz saıty.
Jalpy ótken jyly ınvestorlardy qorǵaý sanatynda Qazaqstan reıtıngisi 34 satyǵa joǵarylady.
2011 jyly Qazaqstan Úkimeti ınvestıtsııalyq jaǵdaıdy jaqsartyp, ınvestorlardy qoldaý úshin ınvestıtsııa tartý jóninde Ulttyq jospar qabyldady.
Táýelsizdik alǵannan beri Elbasy Nursultan Nazarbaev respýblıkada qolaıly ınvestıtsııalyq jaǵdaı jasaýǵa erekshe nazar bólip keledi. 1991 jyldan bastap Qazaqstan ashyq naryqtyq ekonomıka, bıznes júrgizýge jaǵdaı jasaý, tikeleı sheteldik ınvestıtsııa tartý úshin mańyzdy áleýmettik-ekonomıkalyq reformalar jasaýǵa kiristi.
«Qazaqstan qolaıly salyqtyq-ınvestıtsııalyq jaǵdaı, turaqty banktik qarjy júıesimen erekshelenedi. Memleket óńdeýshi ónerkásip salasyna barynsha basymdyq beredi. Meniń oıymsha, bul elimizdiń basym salalaryna ınvestıtsııa quıýǵa múddesi bar sheteldik kompanııalarmen yntymaqtastyqty keńeıtýge jáne tereńdetýge úlken múmkindik týdyrady», - dep atap ótken burynyraq QR Premer-Mınıstri Kárim Másimov.
Qazaqstan Úkimeti qabyldaǵan ınvestıtsııa tartý jónindegi Ulttyq jospar protsedýralyq jáne vızalyq jeńildikter, ınvestorlar úshin, sonyń ishinde aımaqtardaǵy ınvestorlar úshin jaǵdaı jasaý, ınvestorlarǵa barlyq deńgeıde qoldaý bildirýdi kózdeıdi.
Qazaqstanda ınvestorlar úshin elimiz týraly barynsha tolyq aqparat beretin 12 tilde ulttyq ınvestıtsııalyq veb-saıt iske qosylǵan (www.invest.gov.kz ). Qazirdiń ózinde álemniń 150 elinen 55 myń adam saıtqa kirgen. Búgingi tańda, 42 eldegi 209 sheteldik ınvestormen, sonyń ishinde 28 elden 136 tehnologııalyq kóshbasshymen kelissózder júrgizilip jatyr.
2011 jyldyń І jartyjyldyǵynda óńdeýshi ónerkásiptegi ınvestıtsııa ósimi 35 paıyzdy qurap, 1,5 mlrd. AQSh dollaryna jetken.
Halyqaralyq sarapshylar respýblıkadaǵy ınvestıtsııalyq jaǵdaıdy jaqsartý úshin Úkimet tarapynan qolǵa alynyp jatqan sharalarǵa joǵary baǵa bergen. Mysaly, «Ernst & Young» kompanııasynyń Bas operatsııalyq dırektory Djon Ferraronyń aıtýynsha, Qazaqstan TMD-daǵy tartymdy naryǵy bar elderdiń úshtigine kiredi.
Al óz kezeginde Reseı jáne TMD boıynsha RBS Basshysy Dýglas Kennedı Qazaqstanda ashyq ınvestıtsııalyq jaǵdaı qalyptastyp jatqanyn atap ótken.
