2011 jyly bilim salasy qyzmetkerleriniń ústinen jemqorlyq faktileri boıynsha 105 qylmystyq is qozǵaldy - QR BǴM
ASTANA. 16 qarasha. QazAqparat /Gúlmıra Alıakparova/ - 2011 jyldyń toǵyz aıynda Qazaqstanda bilim salasy qyzmetkerleriniń ústinen jemqorlyq faktileri boıynsha 105 qylmystyq is qozǵalyp, 57-si jazaǵa kesildi.
Bul týraly búgin QR Bilim jáne ǵylym mınıstrliginiń keńeıtilgen alqa májilisinde vedomstvonyń jaýapty hatshysy Bolat Ábdirásilov málim etti.
B.Ábdirásilov atap kórsetkendeı, bilim salasynda jemqorlyqqa qarsy júrgizilip jatqan sharalardyń nátıjesinde sala qyzmetkerleriniń qylmystyq, ákimshilik jáne tártiptik jaýapkershilikterge tartylý úrdisi azaıyp keledi.
«Atap aıtqanda, Quqyqtyq statıstıka jáne arnaıy esepter komıtetiniń málimetteri boıynsha, «Sybaılas jemqorlyqqa qarsy kúres týraly» Zańǵa sáıkes, Qazaqstanda tártiptik jaýapkershilikke tartylǵan mektepke deıingi, orta jáne arnaıy-tehnıkalyq bilim berý salasy qyzmetkerleriniń sany 2009 jyly - 667, 2010 jyly - 900 jáne 2011 jyldyń 9 aıy ishinde - 524-ti qurady. Jaqsarý dınamıkasy sondaı-aq qylmystyq ister boıynsha da baıqalýda. Máselen, sybaılas jemqorlyq qylmystary boıynsha 2009 jyly 254 qylmystyq is qozǵalyp, 97 adam sottaldy. 2010 jyly 214 qylmystyq is boıynsha 119 qyzmetker temir tordyń ar jaǵyna toǵytyldy. Al aǵymdaǵy jyldyń 9 aıy ishinde qozǵalǵan 105 is boıynsha 57 adamǵa aıyptaý úkimi shyqty», - dedi ol.
Jaýapty hatshynyń aıtýynsha, atalǵan jemqorlyq qylmystardyń 53 paıyzyn - senip tapsyrylǵan ózgeniń múlkin talan-taraj etý, 17 paıyzyn - laýazymdy qyzmetin asyra paıdalaný, 13 paıyzyn - qyzmettik jalǵandyq, 12 paıyzyn para alý jáne arada deldal bolý faktileri qurap otyr.
Sondaı-aq málim bolǵandaı, Shyǵys Qazaqstan, Qyzylorda jáne Aqtóbe oblystarynda sotty bolǵan bilim salasy qyzmetkerleriniń sany artyp keledi. 2011 jyl ishinde qylmystyq jaýapkershilikke eń kóp tartylǵan óńirler - Ońtústik Qazaqstan, Aqtóbe jáne Jambyl oblystary. «Onymen birge, Aqmola men Qostanaı oblystarynda sońǵy eki jylda bilim berý qyzmetkerleri qylmystyq jaýapkershilikke tartylǵan joq», - dep naqtylady B.Ábdirásilov.
Al jemqorlyq quqybuzýshylyqtar úshin ákimshilik jaýapkershilikke tartylǵandardyń statıstıkasy onsha qýantarlyq emes. Máselen, 2009 jyly ákimshilik jaýapkershilikke bilim berý salasynyń 30 qyzmetkeri tartyldy, 2010 jyly bul kórsetkish 7-ge deıin azaısa, 2011 jyldyń 9 aıynda 23-ke artty.
«2011 jyly ákimshilik quqyqbuzýshylyqtardyń ósimi eń kóp tirkelgen aımaqtar - Batys Qazaqstan, Pavlodar, Jambyl jáne Ońtústik Qazaqstan oblystary», - naqtylady vedomstvo ókili.
