2011 jyly Astana qalalyq sotyna túsken aryz-shaǵymdardyń sany 13 paıyzǵa kóp boldy
ASTANA. 25 qańtar. QazAqparat /Jasulan Joldybaev/ - 2011 jyly Astana qalalyq sotyna azamattardan 37 500 aryz-shaǵym kelip tústi.
Bul ótken jylmen salystyrǵanda 5 myń iske nemese 13 paıyzǵa kóp.
Bul týraly búgin Astana qalalyq sotynyń 2011 jylǵy jumysynyń qorytyndylaryna arnalǵan keńeıtilgen keńeste appelıatsııalyq sot alqasynyń tóraǵasy Serik Ábdirahmanov aıtty.
«Túsetin aryz-shaǵymdardyń sany jyldan-jylǵa ósýde. Soǵan baılanysty, sýdıalarǵa salynatyn jumys kólemi de artyp otyr. Bul tıisinshe, sot tóreliginiń sapasyna da áser etti», - deıdi ol.
Aryzdardyń deni elordadaǵy Almaty aýdandyq sotyna (12,8 myń is), qalalyq mamandandyrylǵan aýdanaralyq ekonomıkalyq sotyna (11 myńnan astam) jáne Saryarqa aýdandyq sotyna (9 myń) túsken.
Astana qalalyq sotynyń tóraǵasy Sáken Abdýllaevtyń aıtýynsha, byltyr elordanyń qalalyq sotynda qylmystyq is alǵash ret beınekonferentsııa baılanysy arqyly qaraldy. Onyń barysynda Qazaqstannyń ár oblysynda turatyn kýágerlerden jaýaptar alyndy. Sonymen qatar, «elektrondyq úkimet» portaly arqyly alǵash ret elektrondy aryz túsken. Qazirgi ýaqytta azamattardan portal arqyly túsken aryzdardyń sany 20-ǵa jetip otyr.
