2011 jylǵy ǵylym salasyndaǵy ataýly syılyqtar taǵaıyndaldy
ASTANA. 26 jeltoqsan. QazAqparat /Qanat Mámetqazyuly/ - QR Bilim jáne ǵylym mınıstri Baqytjan Jumaǵulovtyń basshylyǵymen 2011 jylǵy ǵylym salasyndaǵy syılyqtardy taǵaıyndaý boıynsha
konkýrstyq materıaldardy qaraý jáne usynymdyq sheshimderdi daıyndaý jónindegi Konkýrstyq komıssııa otyrysy ótti. Bul týraly atalmysh vedomstvonyń baspasóz qyzmetinen habarlandy.
«Ǵylym salasyndaǵy syılyqtardy taǵaıyndaý - qazaq zııalylary men ǵylymı elıtanyń arasynda úlken mańyzǵa ıe. Sebebi, atalmysh syılyqtardyń ataýy Qazaqstannyń aıtýly qoǵam qaıratkerleri men ǵalymdarymen tyǵyz baılanysty. Konkýrstyq komıssııa 2011 jylǵy ǵylym salasyndaǵy syılyqtardy ıelenýge arnalǵan baıqaýǵa tapsyrylǵan jumystardy qarap, olardy taǵaıyndaý jóninde usynymdyq sheshimderdi qarastyrdy», delingen baspasóz habarlamasynda.
Bul rette Qazaqstan Respýblıkasy 2011 jyldyń 19 shildesindegi №830 «Memlekettik ǵylymı stıpendııalar men ǵylym salasyndaǵy syılyqtar týraly» qaýlysymen 2011 jylǵy ǵylym salasyndaǵy mynadaı syılyqtar bekitildi: Jaratylystaný ǵylymdary salasyndaǵy úzdik ǵylymı zertteý jumysy úshin Q. Sátbaev atyndaǵy syılyq; Gýmanıtarlyq ǵylymdar salasyndaǵy úzdik ǵylymı zertteý jumysy úshin Sh. Ýálıhanov atyndaǵy syılyq; Pedagogıka ǵylymdary salasyndaǵy úzdik ǵylymı zertteý jumysy úshin Y. Altynsarın atyndaǵy syılyq; Túrkologııa salasyndaǵy úzdik ǵylymı zertteý jumysy úshin Kúltegin atyndaǵy syılyq; Jaratylystaný ǵylymdary salasyndaǵy úzdik ǵylymı zertteý jumysy úshin D. Qonaev atyndaǵy syılyq jáne Gýmanıtarlyq ǵylymdar salasyndaǵy úzdik ǵylymı zertteý jumysy úshin - M. Áýezov atyndaǵy syılyq.
Baıqaýǵa usynylǵan 178 ǵylymı-zertteý jumystarynyń ishinde teorııalyq jáne tájirıbelik mańyzy zor, ǵylymı mazmuny tereń, ǵylymı mindetterdi aıqyndaý jáne sheshýdegi ereksheligimen daralanǵan úzdik 5 jumys anyqtaldy. Konkýrstyq komıssııanyń sheshimimen bıylǵy jyly Kúltegin atyndaǵy syılyq taǵaıyndalǵan joq. Osyǵan oraı, 2011 jyly ǵylym salasyndaǵy ataýly syılyqtar tómendegi zertteýshi-ǵalymdarǵa taǵaıyndaldy:
- Q. Sátbaev atyndaǵy syılyq - professor Z.S. Ábisheva jetekshilik etken jer, metallýrgııa jáne baıytý ǵylymı ortalyǵynyń ǵalymdar tobyna;
- Sh. Ýálıhanov atyndaǵy syılyq - «Turan» ýnıversıtetiniń professory A.T. Áshimbaevaǵa;
- Y. Altynsarın atyndaǵy syılyq - Ál-Farabı atyndaǵy QazUÝ-dyń professory J.J. Moldabekovke;
- D. Qonaev atyndaǵy syılyq - J. Ábishev atyndaǵy Hımııa-metallýrgııalyq Instıtýttyń ǵalymdar tobyna;
- M. Áýezov atyndaǵy syılyq - A.H. Marǵulan atyndaǵy arheologııa ınstıtýtynyń ǵylymı qyzmetkeri T.N. Smaǵulovqa berildi.
Ǵylym salasyndaǵy ataýly syılyqtardy saltanatty túrde tabystaý Astana qalasynda ótedi.
