2011 jylǵy 7- Qysqy Azııa oıyndarynyń Alaý estafetasyna qatysatyn alaýgerlerdiń tizimi bekitildi

7-Qysqy Azııa oıyndarynyń Alaý estafetasyna alaýgerlerdi irikteý boıynsha respýblıkalyq komıssııany Azııa oıyndaryn Uıymdastyrý komıteti tóraǵasynyń orynbasary, QR Týrızm jáne sport mınıstri Temirhan Dosmuhambetov basqardy. Komıssııa quramyna elge tanymal sportshylar, saıasat pen mádenıet qaıratkerleri endi.

Alaýgerlerdi irikteý boıynsha baıqaý úmitkerlerden ótinimderdi qabyldaýdan bastaldy jáne barlyq óńirlerde oblys ákimderiniń tóraǵalyq etýimen Alaý estafetasyn uıymdastyrý jónindegi shtab quryldy. Іrikteý kezinde qandaı da bir qoǵamdyq jetistikteri bar, ómirlik ustanymdary joǵary, elge, halyqqa eńbegi sińgen azamattar basymdyqqa ıe boldy.

Mysalǵa, Qyzylorda oblysynda júgiretin alaýgerlerdiń arasynda KSRO-nyń sport sheberi, 1972 jylǵy Mıýnhendegi Olımpıadada basketbol týrnıriniń aqtyq saıysyna qatysqan, olımpıada chempıony atanǵan alǵashqy qazaq - Áljan Jarmuhamedov bar. Ánshi Roza Rymbaeva Azıada Alaýyn kindik qany tamǵan Shyǵys Qazaqstan oblysynda alyp júretin bolsa, Qydyráli Bolmanov - Qaraǵandy, Ilıa Ilın - Qyzylorda oblystarynyń alaýgerleri.

Alaýgerlerdi irikteýdiń ekinshi kezeginde basymdyq - tótenshe jáne oqys oqıǵalar kezinde erlik tanytqan, adam ómirin ólim aýzynan arashalap qalǵan «batyrlarǵa» berildi. Olardyń arasynda órt sóndirýshiler, polıtseıler, qutqarýshylar jáne basqa da «beıbit» mamandyqtarda jumys isteıtin azamattar bar. Máselen, estafetanyń Astanada ótetin kezeńinde Qostanaı oblysynyń atynan Sadovyı kentiniń 20 jastaǵy dene shynyqtyrý pániniń muǵalimi Artem Kolesnıchenko qatysady. Artem ótken jyldyń jazynda Tobyl ózenine batyp bara jatqan qyzdy qutqaryp qalǵan.

Baıqaýdyń úshinshi kezeńinde el abyroıyn halyqaralyq arenalarda birneshe márte asqaqtatqan - «juldyzdy» sportshylarǵa shaqyrýlar jiberildi. Olardyń arasynda Dáýlet Turlyhanov, Jaqsylyq Úshkempirov, Olga Shıshıgınalar bar. Aıta keteıik, Azıada Alaýynyń estafetasyna alaýger retinde qatysýǵa quqyq beretin alǵashqy sertıfıkat Qazaqstandaǵy Grekııa Respýblıkasynyń Elshisi Evagelos Denaksasqa tapsyrylǵan bolatyn.

Elbasy Nursultan Nazarbaev óziniń Qazaqstan halqyna arnaǵan Joldaýynda elde buqaralyq sportty damytý qajettigin jáne aldaǵy 7-Qysqy Azııa oıyndary barysynda soǵan nazar aýdarylýy tıistigin qadap aıtqan bolatyn. Sol sebepti alaýgerlikke 14 jastan joǵary adamdar iriktep alyndy. Onymen birge tańdaýdyń 70 paıyzy aýyldyq jerlerge, 30 paıyzy qala halqyna berildi.

Baıqaý nátıjesi boıynsha respýblıkada barlyǵy 1020 alaýger, ár oblystan - 60, Almatydan - 80 jáne Astanadan - 100 adam iriktep alyndy.

Azıada Alaýy 2011 jylǵy 11 qańtar kúni Azııa Olımpıadalyq keńesiniń (AOK) shtab-páteri ornalasqan Ál-Kýáıt qalasyndaǵy «Kýáıt Taýers» munaralarynyń aldyndaǵy alańda tutandyrylady. Alaýdy saltanatty jaǵdaıda tutandyrý qurmeti AOK-nyń Prezıdenti sheıh Ahmad ál-Fahad ál-Sabahqa berildi. A.Sabahtyń qolynan Alaýdy qazaqstandyq taraptan birinshi bolyp 7-Qysqy Azııa oıyndaryn Uıymdastyrý komıteti tóraǵasynyń orynbasary, QR Týrızm jáne sport mınıstri T. Dosmuhambetov qabyldap alady.

Óz kezeginde T.Dosmuhametov Alaýdy muzda mánerlep syrǵanaýshy Abzal Rahymǵalıevke tapsyrady. Odan ári Ot - Kýáıt sportshysynyń jáne buǵan deıingi Qysqy Azııa oıyndaryn óz alańdarynda qabyldaǵan káris, qytaı jáne japon elderi sportshylarynyń qoldaryna ótedi. Shaǵyn estafetany otandyq veloshabandoz Aslan Bazaev tuıyqtaıdy. Saltanatty shara «Sazgen sazy», «Gúlder» ansamblderi men «Ulytaý» tobynyń kontsertine ulasady.

Al 12 qańtar kúni Alaý ushaqpen Almaty qalasyna jetkiziledi de, Qazaqstandaǵy Azıada Alaýy estafetasynyń alǵashqy kezeńi bastalady. Árbir alaýgerge 6 alaý saqshysy men arnaıy avtokolonna ilesip júretin bolady. Dál osy tártippen estafeta eldiń barlyq óńirlerinde ótedi. Saıahat barlyǵy 20 kúnge sozylady. Estafeta 30 qańtar kúni Astana qalasyndaǵy «Astana-Arena» stadıonynda márege jetip, Oıyndardyń bas qazandyǵyn jaǵady.