2011 jylǵy 1 maýsymnan bastap Atyraý-Astana baǵytynda poıyz kúnara júretin bolady

Bul týraly QR Kólik jáne kommýnıkatsııa mınıstri Ábilǵazy Qusaıynov respýblıkalyq aqparattyq-nasıhat toby jumysynyń aıasynda Atyraý oblysynyń eńbek ujymdary jáne turǵyndarmen kezdesýi barysynda málim etti.

Júzdesý barysynda mınıstr, temirjol kóligi salasynda batys óńirinde salynyp jatqan «Ózen - Túrkimenstanmen memlekettik shekara» atty jańa temirjol jelisine toqtalyp ótti. Onyń aıtýynsha, nysannyń paıdalanýǵa berilýi halyqqa kóliktik qyzmet kórsetý jaǵdaıyn jaqsartyp, Parsy shyǵanaǵy elderine shyǵý múmkindigin ashýmen birge jańa jumys oryndarynyń paıda bolýyn qamtamasyz etetin bolady. Bul, ásirese, tranzıttik tasymaldarǵa tikeleı qatysy bar Atyraý oblysy úshin óte mańyzdy.

«Budan bólek, Atyraý óńiri turǵyndarynyń suraýy boıynsha, 2011 jylǵy 1 maýsymnan bastap Atyraý-Astana baǵytynda tike poıyz kúnara júretin bolady. Poıyz 10 vagon quramynan tursa, bir baǵytta 400-den astam jolaýshyny tasymaldaıdy. Sonymen qatar, 2010-2014 jyldarǵa arnalǵan Qazaqstannyń kóliktik ınfraqurylymyn damytý baǵdarlamasyna sáıkes, Atyraý qalasynyń áýejaıynda jolaýshy jáne júk termınaldaryn salý josparlanǵan. 2013-2014 jyldary júzege asyrylatyn jobanyń quny shamamen 9,0 mlrd. teńge», delingen baspasóz aıǵaǵynda.