2011 jyldyń jazy salqyn jáne qurǵaq bolady - sınoptıkter
ASTANA. 16 naýryz. QazAqparat /Jasulan Amanbaıuly/ - 2011 jyldyń jazy salqyn jáne qurǵaq bolady. Bul týraly búgin baspasóz máslıhaty barysynda «Qazgıdromet» RMK Gıdrometortalyǵynyń dırektory Baıan Sazanova málim etti.
«Bıylǵy jaz - 2010 jyly eldiń batysynda bolǵan aýa raıyna uqsas bolady dep oılamaımyz. Osy jazda aýa raıy salqyn jáne qýańshylyq bolady»,-dep atap kórsetti B. Sazanova.
Óz kezeginde «Qazgıdromet» RMK Agrometeoortalyǵynyń basshysy Sáken Baısholanov, eldegi aýyl sharýashylyǵy óndirýshilerine arnalǵan boljamdardy aıtyp berdi. Mamyr aıynda eldiń shyǵysyndaǵy keıbir jazyq dalaly aýmaqtarda, Ortalyq Qazaqstan jáne Aqmola oblystarynda az shamada ylǵal túsedi. Soltústik Qazaqstan, Pavlodar, Qostanaı jáne Aqtóbe óńirleri orta ylǵaldy bolady dep boljanýda. Qalǵan aımaqtarda qatty qýańshylyq oryn alady.
Maýsym aıynda jaǵdaı shamaly ózgerip, eldiń shyǵysyndaǵy jáne ońtústik-shyǵysyndaǵy taýly jerlerde, Soltústik Qazaqstan jáne Aqmola oblystarynyń shektes jerlerinde aıtarlyqtaı ylǵal túsedi. Bul aıda soltústik óńirlerde jaýyn-shashynnyń kólemi az bolady. Ylǵaldylyqtyń ortasha deńgeıi respýblıkanyń batysynda, soltústik-shyǵysynda jáne ortalyǵynda tirkeleýi yqtımal. Qalǵan aımaqtarda qurǵaqshylyq bolady. Shilde aıyndaǵy ylǵaldyń deńgeıi osyǵan uqsas bolyp qalmaq.
