2011 jyldyń on bir aıynda Keden Odaǵy elderi arasynda ózara saýda kólemi 21 mlrd. dollardan asty
ASTANA. 13 qańtar. QazAqparat /Jasulan Joldybaev/ - 2011 jyldyń qańtar-qarashasy aralyǵynda Keden Odaǵy elderiniń ózara saýda kólemi 21 mlrd. 431 mln. AQSh dollaryn qurady.
Bul týraly búgin ótken brıfıngte QR Statıstıka agenttiginiń tóraǵasy Álıhan Smaıylov aıtty.
«Keden Odaǵy elderiniń ózara saýdasy 2011 jyly qańtar-qarasha aıynda 21 mlrd. 431 mln. AQSh dollaryn qurady. Bul 2010 jyldyń qańtar-qarashasymen salystyrǵanda 40 paıyzǵa artyq dep aıtýyǵa bolady. Onyń ishinde 6 mlrd. 726 mln. AQSh dollary - eksport, ol 46 paıyzǵa ósti. Importtyń kólemi 37 paıyzǵa ósip, 14 mlrd. 704 mln. AQSh dollaryn qurady», - dedi vedomstvo tóraǵasy.
Qazaqstan eksportynyń basym bóligin mıneraldy ónimder, metaldar jáne olardan jasalǵan buıymdar (23,6 paıyz), hımııalyq ónerkásip ónimderi (7,7 paıyz) qurady.
Al Belarýs pen Reseı elderinen úlken dárejede mıneraldy ónimder, mashınalar men jabdyqtar, metaldar jáne olardan jasalǵan buıymdar, hımııalyq ónerkásip ónimderi ákelindi.
