2011 jyldyń qańtarynda el aýmaǵynda 1296 órt oqıǵasy boldy - QR TJM
ASTANA. 24 aqpan. QazAqparat /Gúlmıra Álıakpaorva/ - 2011 jyldyń qańtarynda respýblıka aýmaǵynda óndiristik jáne turmystyq sıpattaǵy 1296 órt boldy,
saldarynan 104 adam zardap shegip, 46 adam ajal qushty. Bul týraly búgin ótken baspasóz máslıhatynda QR Tótenshe jaǵdaılar mınıstrliginiń resmı ókili Lıýbov Shaposhnıkova málim etti.
«Órt kezinde adamdardyń qaza bolýy, ásirese balalar ólimi asa alańdaýshylyq týǵyzady. Tilsiz jaýdyń saldarynan kelgen materıaldyq shyǵyn shamamen 247 mln. 605 teńgeni quraıdy. Ótken jylmen salystyrǵanda órtterdiń sany 15,2 paıyzǵa, qaza bolǵandar 21,1 paıyzǵa ósti, al materıaldyq shyǵyn 6,9 paıyzǵa azaıdy. Ot shyǵatyn negizgi nysandar turǵyn úıler bolyp otyr, bul barlyq oqıǵalardyń 75,2 paıyzyn quraıdy. Sondaı-aq, órtený jaǵdaılarynyń 13,6 paıyzy kólik quraldarynda, 2,4 - saýda nysandarynda, 2,8 - óndiristik mańyzdaǵy ǵımarattar men qurylystarda, 1,8 ákimshilik-qoǵamdyq ǵımarattarda boldy», - dep atap ótti L.Shaposhnıkova.
Resmı ókildiń aıtýynsha, zardap shekkenderdiń jalpy sanynyń 35 paıyzy nemese 109 adam - ıis tıip ýlanǵandar, al 33,9 paıyzy nemese 104-i óndiriste nemese úıde bolǵan órtterde zardap shekkender. «Adamdardyń ýlanýy negizinen qatty otynmen janatyn peshterdi qoldaný kezinde qaýipsizdikti saqtamaýdan bolyp otyr», - dep anyqtady ol.
L.Shaposhnıkovanyń sózine qaraǵanda, mas kúıinde shylym shegý de arty qaterli saldarǵa ákep soqtyratyn birden-bir faktor.
QR TJM usynǵan málimetterge súıenip birneshe mysal keltireıik, aǵymdaǵy jylǵy 13 aqpanda keshqurym Shyǵys Qazaqstan oblysynyń Rıdder qalasyndaǵy jekemenshik turǵyn úıde peshtiń aqaýy saldarynan órt shyǵyp, saldarynan eki adam oqıǵa ornynda kóz jumdy, 3 jasar bala, 22 jastaǵy jigit pen 38, 48 jáne 49 jastaǵy úsh áıel ıis tıip, aýrýhanaǵa jetkizildi.
Sol sııaqty 16 aqpan kúni Astana qalasynyń Almaty aýdanyndaǵy jer úılerdiń birinde bolǵan uqsas oqıǵada 2, 3 jáne 5 jastaǵy búldirshinder kómirqyshqyl gazyna ýlanyp qaldy.
