2011 jyldyń qańtarynan elimizde bir jolǵy talondardy alyp tastaý negizinde arnaıy salyq rejımi ózgeredi
ASTANA. Qańtardyń 19-y. QazAqparat /Qanat Mámetqazyuly/ - 2011 jylǵy qańtardyń 1-inen bastap elimizde bir jolǵy talondardy alyp tastaý negizinde arnaıy salyq rejımi ózgertiledi.
Bul týraly búgin QR Parlamenti Májilisinde «QR keıbir zańnamalyq aktilerine saýda qyzmetin retteý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda Indýstrııa jáne saýda vıtse-mınıstri Tımýr Jaqsylyqov málim etti, dep habarlaıdy QazAqparat.
«Úkimet basshysy Keden odaǵyn qurýdy eskere otyryp jáne elimizde engiziletin salyq rejıminiń ózgeristerine oraı bir jolǵy talondardy alyp tastaý týraly másele qoıyp, sol úshin arnaıy tapsyrmalar júktegen bolatyn. Búgingi kúni osy baǵytta júıeli sharalar qabyldanyp jatyr. Degenmen, bir jolǵy talondardy alyp tastaý salyq organdarynyń salyqtyq ákimshilendirý máseleleri boıynsha bazarlarda saýda jasaıtyn birqatar salyq tóleýshilerge qatysty problemalaryn týyndatýy múmkin. Bunyń ózi bıýdjet kiristerin tómendetýi de ǵajap emes. Sondyqtan da, zań jobasyna Salyq komıtetiniń usynysy boıynsha saýda nysandaryn basqarýshynyń mindetteri týraly baptar engiziledi», dedi vıtse-mınıstr. Onyń aıtýynsha, bul norma saýdany kóleńkeden shyǵarý maqsatyna tikeleı áser etetin bolady.
