2011 jyldyń aıaǵyna qaraı Irak pen Aýǵanstandaǵy amerıkandyq áskerı qyzmetshilerdiń sany eki esege deıin qysqarady - AQSh Prezıdenti Barak Obama
TANA. 21 qyrkúıek. QazAqparat /Muratbek Maqulbekov/ - 2011 jyldyń aıaǵyna qaraı Irak pen Aýǵanstandaǵy amerıkandyq áskerı qyzmetshilerdiń sany eki esege deıin qysqarady.
Bul týraly AQSh prezıdenti Barak Obama Birikken Ulttar Uıymy Bas Assambleıasy 66-y sessııasynyń tańerteńgi otyrysynda málimdedi.
AQSh prezıdenti atap ótkendeı, amerıkandyq kontıngent sanyn qysqartý Irak pen Aýǵanstannyń táýelsizdigin nyǵaıtý úshin de, AQSh-tyń ishki qaýipsizdigin qamtamasyz etý úshin de mańyzdy.
Eske sala ketsek, Nıý-Iorkte Birikken Ulttar Uıymy Bas Assambleıasynyń 66- sessııasy bastaldy, oǵan Qazaqstan Prezıdenti Nursultan Nazarbaev qatysýda.
Kútilip otyrǵandaı, Memleket basshysy jalpy jaryssózderdiń ashylýynda sóz sóıleıdi. Búgin sonymen qatar N.Nazarbaevtyń memleketter men halyqaralyq uıymdar basshylarymen birqatar ekijaqty kezdesýleri josparlanyp otyr.
