2011 jyldan bastap «Samuryq-Qazyna» kompanııalarynyń aktsııalary qor naryǵynda ornalastyrylady - Úkimet basshysy
ANA. 18 qarasha. QazAqparat /Rýslan Ǵabbasov/ - 2011 jyldan bastap «Samuryq-Qazyna» Qoryna qarasty kompanııalardyń aktsııalary qor naryǵynda ornalastyrylady. Bul týraly búgin Astandaǵy «Ekspert-100-Qazaqstan» ekinshi ekonomıkalyq forýmynda Úkimet basshysy Kárim Másimov málim etti.
Úkimet basshysy eki kún buryn «Samuryq-Qazyna» ál-aýqat qory dırektorlar keńesiniń keńeıtilgen otyrysy ótkenin aıta kele, onda «Samuryq-Qazyna» quramyna kiretin kompanııalar jaǵynan qazaqstandyq azamattar men zeınetaqy qorlary úshin aktsııalardy ornalastyrý jáne jekemenshikke alý máselesi boıynsha sheshim qabyldanǵanyn jetkizdi.
Jyl sońyna deıin Qor bul máseleni qarastyratynyna toqtalǵan K. Másimov: «Biz bul máseleni Qarjylyq baqylaý agenttigimen, Ulttyq bankpen, QR Almaty qalasy óńirlik qarjy ortalyǵymen birge Úkimet otyrysynda arnaıy talqylaıtyn bolamyz»,-dedi. Osy oraıda Premer-Mınıstr «Samuryq-Qazyna» qurylymyna kiretin iri kompanııalardyń aktsııalaryn ornalastyrý turǵysynda 2011 jyldan bastap qor naryǵyn damytý boıynsha aýqymdy baǵdarlama iske qosylatynyn jetkizdi.
«Meniń paıymdaýymsha, bul daǵdarystan keıingi mańyzdy qadamdardyń biri bolyp tabylady, óıtkeni daǵdarys kezinde memleket róli aıtarlyqtaı joǵarylady. Alaıda daǵdarystan keıingi kezeńde jeke sektor belsendilikti budan ary qaraı jalǵastyrý úshin bul ádistemeni ózgertý qajet»,-dep atap ótti Úkimet basshysy.
K. Másimovtyń sózine qaraǵanda, aldaǵy jyldyń qańtarynda «Samuryq-Qazyna» qory atalǵan aýqymdy baǵdarlamany usynatyn bolady. «Atap aıtqanda aktsııalar aınalymǵa túsip, qazaqstandyq qor naryǵyn damytý sharalaryn qurý úshin Qazaqstan azamattary birinshi bolyp bul aktsııalardy satyp alýy mańyzdy sanalady»,-dedi Úkimet basshysy.
