2011 jyldan bastap Astana-Býrabaı avtomagıstrali aqyly bolady - Kólik mınıstri
ASTANA. 20 jeltoqsan. QazAqparat /Qanat Mámetqazyuly/ - 2011 jyldan bastap Astana-Býrabaı avtomagıstrali aqyly bolady.
Bul týraly búgin QR Parlamenti Májilisinde ótken Úkimet saǵatynda Kólik jáne kommýnıkatsııa mınıstri Ábilǵazy Qusaıynov aıtty.
«Bul rette kelesi jyldan bastap Astana-Býrabaı avtobanyndaǵy baǵa jeńil kólikter úshin shaqyrymyna 2 teńge, al kommertsııalyq kólikterge shaqyrymyna 15 teńge bolyp belgilenip otyr. Onyń ishinde avtobýstarǵa 5-ten 15 teńge aralyǵynda aqy tóleýge týra keledi. Al osy avtomagıstral boıynda ornalasqan eldi mekenniń turǵyndary úshin onymen júrý tegin bolady. Óıtkeni, olarǵa bir kúnniń ishinde osy jolmen birneshe márte qatynaýyna týra keledi. Sondyqtan jol boıy eldi mekenderiniń turǵyndarynan aqy alynbaıdy», - deıdi mınıstr.
Esterińizge sala keteıik, uzaqtyǵy 224 shaqyrym bolatyn elimizdegi alǵashqy úlken jyldamdyqty Astana-Býrabaı avtomagıstraliniń qurylysy 2006 jyly bastalǵan bolatyn. Alty jolaqty jańa jol tehnıkalyq sanaty 1-A parametrlerine sáıkes keledi. Joldyń esepti jyldamdyǵy saǵatyna 150 shaqyrymdy quraıdy. Jobanyń quny 115 mlrd. teńgeden astam.
