2011 jyldan bastap árbir dárigerdiń jalaqysy oǵan tirkelgen halyqtyń sanyna baılanysty taǵaıyndalatyn bolady - E.Birtanov
ASTANA. Aqpannyń 18-i. QazAqparat /Gúlmıra Álıakparova/ - 2011 jyldan bastap árbir dárigerdiń jalaqysy oǵan tirkelgen halyqtyń sanyna baılanysty taǵaıyndalatyn bolady. Bul týraly búgin Astana qalasy Densaýlyq saqtaý basqarmasynyń alqa májilisinen keıin jýrnalısterdiń saýalyna jaýap bergen Densaýlyq saqtaý vıtse-mınıstri Eljan Birtanov aıtty,
dep habarlaıdy QazAqparat.
Aıta keteıik, ústimizdegi jylǵy qańtardyń 1-inen bastap Qazaqstannyń medıtsınalyq mekemelerine engizilgen Densaýlyq saqtaýdyń biryńǵaı ulttyq júıesine (DBUJ) sáıkes, árbir azamatqa emhanany jáne dárigerdi óz erkimen tańdaýǵa múmkindik berildi. Osy rette, bilikti mamandarǵa qaralýdy qalaǵandardyń sany da arta túskeni anyq. ıAǵnı bul - atalmysh mamandar emhanaǵa jalpy tirkelgen azamattardyń sanynyń basym bóligine qyzmet kórsetedi degen sóz, al onyń atqarǵan jumysy úshin bıýdjetten bólingen qarajat medıtsınalyq mekemeniń jalpy qyzmetkerleriniń jalaqysyn tóleý úshin ortaq qorjynǵa túsedi. ıAǵnı bireýdiń eńbegimen tapqan aqshasyna bireýler «qoldaryn jylytady».
E.Birtanovtyń aıtýynsha, DBUJ-dyń engizilýine baılanysty júktemeleri artqan bilimdi de bilikti dárigerlerdi qoldaý maqsatynda búginde, Densaýlyq saqtaý mınıstrliginde arnaıy tehnologııa ázirlený ústinde. ıAǵnı dárigerge tirkelgen ár adamǵa qarjylandyrý normatıvi engizilmek jáne ol 2011 jyly naqty iske asyrylatyn bolady.
«Mysalǵa, bir dárigerge 100 adam tirkelse, biz oǵan 100 adamǵa arnalǵan qarjy bóletin bolamyz. Sondaı-aq 300 adam tirkelse, sáıkesinshe 300 adamnyń aqshasyn bólemiz. Sonymen birge, adam basyna arnalǵan qarjylandyrý normatıviniń ekinshi júıesi ázirlenýde. Ol - dárigerdiń ózine tirkelgen ýchaskede júrgizgen aldyn-alý jumystarynyń nátıjesine baılanysty bolady. Aýrýdyń aldyn alý kórsetkishteri jaqsy bolsa, jalaqysyna qosymsha bonýstar tólenedi», - dep atap ótti ol.
Esterińizge sala keteıik, búgingi kúni QR Densaýlyq saqtaý mınıstrligi tek statsıonarlyq medıtsınalyq mekemelerdi ǵana qarjylandyrady. Al keler jyldan bastap DBUJ sheńberinde emhanalar da qarjylandyrýdy respýblıkalyq bıýdjetten alatyn bolady.
