2011-2013 jyldary ınjenerlik júıeler men kommýnaldyq sektordy jańǵyrtýǵa el bıýdjetinen 51 mlrd. teńge bólinedi

Bul týraly búgin elordada ótken baspasóz máslıhatynda QR Qurylys jáne turǵyn úı- kommýnaldyq sharýashylyq isteri agenttigi departamentiniń dırektory Vasılıı Maslov málim etti.

«Bizde bıýdjet úsh jylǵa, ıaǵnı 2011-2013 jyldarǵa jasaqtaldy. Osy bıýdjet aıasynda respýblıkalyq qarajattyń negizgi bóligi (96 paıyzy), naqtylap aıtqanda 51 mlrd. teńgesi ınjenerlik júıeler men kommýnaldyq sektordy jańǵyrtýǵa, qaıta jóndeýge jáne salýǵa baǵyttalady. Oǵan sý, jylý, gaz jáne elektrmen qamtamasyz etý jumystary kiredi», - dedi ol.

Eske salaıyq, eldi mekenderdi aýyzsýmen qamtamasyz etý túıitkilderi ústimizdegi jylǵy qarasha aıynda Úkimet maquldaǵan «Aqbulaq» memlekettik baǵdarlamasy aıasynda sheshiledi. QR Qurylys jáne turǵyn úı- kommýnaldyq sharýashylyq isteri agenttigine bul iste iri jáne kishigirim qalalardy sýmen qamtamasyz etý jumystary júkteldi. Al aýyldyq eldi mekendermen Aýyl sharýashylyǵy mınıstrligi aınalysady.

V.Maslovtyń sózine qaraǵanda, atalǵan 51 mlrd. teńgeniń 25 mlrd.teńgesi sondaı-aq, ınvestıtsııalyq jobalardy júzege asyrýǵa jumsalady. Bul jobalardyń kem degende 10 paıyzyn jergilikti ákimdikter qarjylandyratyn bolady. Osylaısha, 51 mlrd. soma taǵy 11 mlrd. teńgege artady. Onyń syrtynda qyzmetterdi kórsetýshi kásiporyndardyń 208 mlrd. teńge jeke qarajaty taǵy bar.

QR Qurylys jáne turǵyn úı- kommýnaldyq sharýashylyq isteri agenttigi 2020 jylǵa deıin kommýnaldyq júıelerdiń 60 paıyzyn retke keltirip, apatty-qalpyna keltirý jumystarynan onyń aldyn alý ádisterine kóshýdi josparlap otyr.