2011-2012 oqý jylynda memlekettik mektepterdiń úlesi 98,6 paıyzdy qurady
ASTANA. 26 qańtar. QazAqparat - 2011/2012 oqý jylynyń basyna Qazaqstan Respýblıkasynda 7706 kúndizgi jalpy bilim beretin mektepter jumys istedi, olardyń 7596 nemese 98,6 paıyzy memlekettik bolyp tabylady.
QR Statıstıka agenttiginiń málimetinshe, 2011 jyly jalpy respýblıka boıynsha 65 jańa mektep paıdalanýǵa berildi, onyn ishinde 56-sy aýyldyq eldi mekenderde.
Mektepterdiń jalpy sanynan bastaýysh mektepterdiń úles salmaǵy 12,5 paıyzdy, negizgi - 14,8 paıyzdy, orta - 69,1 paıyzdy qurady. Bastaýysh mektepterdiń jalpy sanynan 95,4 paıyzy aýyldyq eldi mekenderde ornalasqan, negizgi jáne orta mektepter boıynsha bul kórsetkish tıisinshe 93,8 paıyzdy jáne 70,6 paıyzdy quraıdy. 2011/2012 oqý jylynyń basyna kúndizgi jalpy bilim beretin mektepterdegi oqýshylar sany 2522,8 myń adamdy qurady, ol ótken oqý jylymen salystyrǵanda 0,3 paıyzǵa kem.
Qarastyrylyp otyrǵan oqý jylynda jalpy bilim beretin mektepterde balalardy oqytý 7 tilde júrgizildi: qazaq, orys, ózbek, uıǵyr, tájik, nemis, jáne aǵylshyn.
Qazaqstan Respýblıkasynda qazaq tilinde (3843) jáne orys tilinde (1508) oqytatyn mektepter basym (orta jáne joǵary oqý oryndary janyndaǵy mektepterdi, arnaıy túzetý mektepterin qospaǵanda). Ótken oqý jylymen salystyrǵanda oqytý tek qana qazaq tilinde júretin mektepter sany 15 mektepke ósti (0,4 paıyzǵa). Sonymen qatar 58 mektepte oqytý ózbek tilinde, 14 - uıǵyr, 8 - aǵylshyn, jáne 2 - tájik tilinde júrgiziledi. Sondaı-aq 2163 mektepte oqytý eki nemese odan kóp tilderde júrgiziledi.
Respýblıkada Qazaqstan halyqtarynyń tilderin damytý úshin jaǵdaılar jasalǵan. 2011/12 oqý jylynda respýblıka mektepterinde bilim berý baǵdarlamasy aıasynda, sonymen qosa fakýltatıvti jáne derbes pán retinde, dunǵan (4853 oqýshy), túrik (4291), uıǵyr (4076), aǵylshyn (2054), polıak (728), kúrd (463), ázirbaıjan (385), koreı (228), tatar (109) jáne basqa ulttyq tilderdi oqytý uıymdastyryldy.
2011/2012 oqý jylynyń basyna respýblıkada ár túrli pánderdi tereńdetip oqytý múmkindigimen 1587 mektep, odan 287 mektep - gımnazııalyq jáne 64 mektep lıtseılik - synyptarmen jumys istedi.
2011/2012 oqý jylynda kúndizgi jalpy bilim beretin mektepterdiń 67%-y sabaqtardy 2- 3 aýysymmen ótkizýde.
