2011-2012 oqý jylyna Astananyń áleýmettik jaǵynan qorǵalmaǵan oqýshylaryna kómek kórsetý úshin bıýdjetten 246 mln. teńge bólindi

Bul týraly búgin «Mektepke jol» atty dástúrli aktsııanyń bastalýyna oraı uıymdastyrylǵan baspasóz máslıhaty barysynda Astana qalalyq bilim basqarmasynyń bastyǵy Ásıma Bımendına aıtty.

«Mektep kıimin, keńse taýarlaryn satyp alý úshin bıýdjetten jalpyǵa mindetti oqý qoryna áleýmettik jaǵynan qorǵalmaǵan oqýshylarǵa kómek kórsetýge 246 mln. teńge bólindi. Bul ótken jylǵa qaraǵanda aıtarlyqtaı kóp. Sonymen qatar bul qarjyny mektep dırektorlary durys ıgerýleri qajet», - dedi ol.

Sondaı-aq qalalyq bilim basqarmasynyń basshysy ózi basqaratyn vedomstvo QR Bilim jáne ǵylym mınıstrliginiń Balalardyń quqyǵyn qorǵaý komıtetimen birlesip, bólingen qarajattyń maqsatty paıdalanylýyna tekserý júrgizetindigin eskertip ótti.