2010 jyly poıyzdarda 2734 bıletsiz jolaýshy, zańsyz tasymaldanbaq bolǵan 297,6 tonna júk anyqtaldy

Bul týraly «Qazaqstan temir joly» Ulttyq kompanııasynan habarlady.

Ótken aptanyń sońynda «Qazaqstan temir joly» UK» AQ-da Temirjol kóligindegi sybaılas jemqorlyqpen jáne jemqorlyq kórinisterimen kúres jónindegi komıssııanyń jáne Tártiptik komıssııanyń birlesken otyrysy ótti. Atalmysh zańbuzýshylyqpen kúres boıynsha 2010 jyly atqarylǵan jumystar týraly «Jolaýshylar tasymaly» AQ-nyń prezıdenti Aqbulat Jaǵyparov, «Áskerılendirilgen temirjol kúzeti» (ÁTJK) AQ-nyń vıtse-prezıdenti Tezek Bekeshev, «Lokomotıv» AQ-nyń vıtse-prezıdenti Qazezhan Jumataev jáne «QTJ» UK» AQ fılıaly «Magıstraldy jeliler dırektsııasynyń» dırektory Qaırat Saýrbaev baıandady.

«Jolaýshylar tasymaly» AQ-nyń prezıdenti A.Jaǵyparovtyń aıtýynsha, bıletsiz jolaýshylar jáne resimdelmegen júkterdi alyp júrý - tasymaldaýshylardyń eń basty problemasy bolyp tabylady. Máselen, 2010 jyly 2734 bıletsiz jolaýshy men zańsyz tasymaldanbaq bolǵan 297,6 tonna júk anyqtaldy. Kompanııa mundaı zań buzýshylyqtardy joıý úshin poıyz brıgadalarynyń qyzmetin udaıy qadaǵalap otyrady. Sol maqsatta revızorlyq apparattyń qurylymyn ózgertti. Qolǵa alynǵan jumystardyń nátıjesinde 2010 jyly «qoıandardyń» sany onyń aldyńǵy jylmen salystyrǵanda 3 esege, al Qazaqstan aýmaǵyndaǵy poıyzdarda - 5 esege deıin azaıdy.

«ÁTJK»-nyń vıtse-prezıdenti atap kórsetkendeı, 2010 jyly qyzmetkerler tártiptik jaýapkershilikke 2009 jylmen salystyrǵanda 3 ese kóp tartyldy. Kórsetkishtiń artýynyń sebebi - kúzet qyzmeti mekemesinde qadaǵalaýdyń kúsheıtilýi jáne jemqorlyqtyq zań buzýshylyqtardyń aldyn alý boıynsha jumystardyń qarqyndy júrgizilýi. Onymen birge, kompanııa biliksiz jumyskerler men basshylardy anyqtaý maqsatynda qyzmetkerlerdi attestatsııadan ótkizedi.

Al «Lokomotıv» AQ-nyń vıtse-prezıdenti Q.Jumataevtyń sózine qaraǵanda, «Lokomotıv» AQ fılıaldarynyń basshylary men jumyskerleri tarapynan lokomotıv brıgadalarynan alym-salyq jınaý faktileri anyqtalyp, joldary kesildi. Sondaı-aq dızel otynyn urlaý áreketterin anyqtaý sharalary jasaldy. Kompanııada 2011 jyl- bilim jyly bolyp jarııalanǵandyqtan, jumyskerler arasynda «Jemqorlyq týraly» QR Zańyn túsindirý jumystaryna jiti kóńil bólinýde.

Otyrys barysynda anyqtalǵan jemqorlyq áreketterdiń naqty faktileri aıtyldy. Olar boıynsha qyzmettik tekserýler júrgizilip, «QTJ» kinálilerge jazalaý sharalaryn qoldandy. Onymen birge, qylmystyq áreketter boıynsha quqyq qorǵaý organdary qylmystyq ister qozǵady.