2010 jyly Qazaqstandyq jarnama naryǵy 12 paıyzǵa ósedi
ALMATY. 12 qarasha. QazAqparat /Erbol Azanbek/ - 2010 jyly Qazaqstandaǵy jarnama naryǵynyń tabysy 12 paıyzǵa ósedi. Biraq daǵdarys aldyndaǵy eń joǵary kórsetkish jarnama naryǵyna 2012-2013 jyldary ǵana oralýy múmkin. Búgin Almatyda ótken úshinshi medıaquryltaı barysynda medıa salasyn zertteýshi TNS Gellap Medıa Azııa agenttiginiń bas dırektory Tatıana Startseva osyndaı boljam aıtty.
Onyń aıtýynsha, bıylǵy jyly eń az ósim telejarnamada bolady. Boljam boıynsha 8 paıyzdyq ósim kórsetedi. Alaıda basqa salalarmen salystyrǵanda telejarnamanyń úlesi bıylǵy jyly azaımaq.
«2009 jyly elimizdegi jarnama berýshilerdiń jıyrmalyǵyna kiretin komapnııalardyń 75 paıyzy telejarnamaǵa júginse, bıyl ol kórsetkish 67 paıyzǵa azaıady. Bunyń ornyn syrtqy jarnama basady. Bıylǵy jyly syrtqy jarnama 32,4 paıyzdyq ósim kórsetedi»,- dedi T. Startseva.
Onyń sózine qaraǵanda, Qazaqstandyq jarnama salasynyń tabysynyń artýyna álemdik jarnama naryǵynyń ósim kórsetýi túrtki bolady. Bıylǵy jyly álemdik jarnama da 12 paıyzdyq ósim kórsetip, 449 mıllıard dollardy quraıdy. Bul rette Qazaqstandyq jarnama naryǵynyń tabysy 154 mıllıon dollar kóleminde bolýy múmkin.
Quryltaıǵa qatysqan «Vıdeo ınterneshnl Qazaqstan» agenttiginiń bas dırektory Dilmurat Raqymovtyń aıtýy boıynsha, Qazaqstandyq jarnama naryǵynyń tabysy 2011 jyly da ósip, 193 mıllıon dollardy quraıdy. Áıtse de qazirgi tańda Qazaqstandyq jarnama salasynyń tabysy áli de tómen.
«Mysaly jarnama naryǵynyń tabysy jan basyna shaqqanda AQSh-ta - 546, Reseıde 41 bolsa, Qazaqstanda 10 dollardyń aınalasynda ǵana»,- dedi sarapshy. Ol sondaı-aq elimizde ınternet jarnamanyń damymaı otyrǵanyn tilge tıek etti. «Qazaqstanda qazirgi tańda ınternet jarnama naryǵynyń 1,15 paıyzyn ǵana quraıdy. Al Reseıde 11 paıyz, jalpy álemdik naryqtyń 14 paıyzy ınternet jarnamanyń úlesinde», - dedi ol.
