2010 jyly Eýropa men Ortalyq Azııanyń damýshy elderiniń jalpy ishki ónimi 3,3 paıyzǵa ósedi - Eýropalyq Qaıta qurý jáne damý banki
ASTANA. Aqpannyń 15-i. QazAqparat - 2010 jyly Eýropa men Ortalyq Azııanyń damýshy elderiniń jalpy ishki ónimi 3,3 paıyzǵa ósedi.
Eýropalyq Qaıta qurý jáne damý bankiniń sarapshylary osyndaı pikir aıtyp otyr.
Bank sarapshylary ótken jyldyń qazan aıynda jasaǵan boljaýlarynda, 2010 jyly aımaq elderi 2,5 paıyz ósimge qol jetkizetinin aıtqan bolatyn.
«Aımaq ekonomıkasynyń qalpyna kelý úderisi áli de bolsa álsiz júrýde, elder arasyndaǵy kórsetkishterdiń aıyrmashylyǵy edáýir. Álemdik ekonomıkanyń birtindep kóterilýi aımaqqa da áserin tıgizedi, biraq birqatar jergilikti faktorlar teris áser etetin bolady. Ekonomıkanyń memlekettik jáne jeke sektorlaryndaǵy sarabdal saıasaty, sondaı-aq «ýytty» aktıvter problemalaryn sheshýge jáne boryshtyq mindettemelerdi qaıta qurylymdaýǵa baǵyttalǵan qajetti sharalar aımaq ekonomıkasynyń ósýin qoldaýda óte mańyzdy rol atqaratyn bolady», dep málim etti Banktiń bas ekonomısi Erık Bergloff.
Eýropalyq Qaıta qurý jáne damý banki sarapshylarynyń boljamynyń ózgerýi Polsha,Túrkııa, Reseı jáne Qazaqstan elderiniń ósý perspektıvasynyń jaqsarýymen baılanysty. Onyń ishinde, Reseı men Qazaqstan shıkizat baǵasynyń kóterilýinen utady, oǵan qosa aımaqqa aǵylǵan sheteldik ınvestıtsııalar artýda.
Sarapshylardyń pikirinshe, 2011 jyly aımaq ekonomıkasy 3,8 paıyzǵa ósýi múmkin.
