2010 jyly elimizdiń úsh munaı óńdeý zaýytynda 13,7 mıllıon tonna shıki munaı óńdeldi
ASTANA. 18 qańtar. QazAqparat - 2010 jyly Qazaqstan Respýblıkasynyń úsh munaı óńdeý zaýytynda 13,7 mıllıon tonna shıki munaı óńdelgen. Bul josparly kórsetkishten 570 myń tonnaǵa nemese 4,35 paıyzǵa artyq bolyp otyr.
«QazMunaıGaz - qaıta óńdeý jáne marketıng» Aktsıonerlik qoǵamy taratqan málimetterge qaraǵanda, munaıdy naqty óńdeýdiń 2009 jylǵy kórsetkishi 1,6 mln tonnany qurap, bul sońǵy birneshe jyldaǵy rekordtyq kórsetkish boldy. Qazaqstannyń munaı óńdeý zaýyttarynda óndirilgen ónimniń kólemi 2010 jyly 12,7 mıllıon tonnany qurady, bul jospardan 567 mln.tonnaǵa nemese 4,68 paıyzǵa artyq. 2009 jylmen salystyrǵanda óndirilgen ónim kólemi 1,5 mln. tonnaǵa nemese 12 paıyzǵa artqan.
Óndiris ónimniń barlyq túrleri boıynsha asyra oryndalǵan. Naqtyraq aıtqanda, óndirilgen ónimniń ishinde AI-92, AI-96 markaly benzın, dızeldi otyn, koks jáne suıytylǵan gaz bar. Daıyndalǵan ónim «Qazaqstan Respýblıkasynyń aýmaǵynda aınalymǵa jiberiletin avtokólik quraldarynyń zııandy (lastaýshy) zattardy shyǵarýyna qoıylatyn talaptar týraly tehnologııalyq reglamenttiń» 2-dárejesiniń talaptaryna tolyǵymen sáıkes keledi.
«Biz eń aldymen, zaýyt basshylyǵynyń biliktiliginiń, zaýyt eńbekkerleriniń úılesimdi jumysynyń jáne eskirgen tehnologııalyq qondyrǵylardy ýaqtyly aýystyrýdyń, sondaı-aq jalpy tehnologııalyq protsesti jańǵyrtýdyń arqasynda osyndaı jetistikterge qol jetkizip otyrmyz», - dedi «QazMunaıGaz» aktsıonerlik qoǵamynyń Bas dırektory Danııar Berlibaev
