2010 jyly elimizdiń shaǵyn munaı óńdeý zaýyttarynda óńdeý kólemi 10 esege tómendedi
ASTANA. Shildeniń 16-sy. QazAqparat /Rýslan Ǵabbasov/ - Ótken jylmen salystyrǵanda, 2010 jyly elimizdiń shaǵyn munaı óńdeý zaýyttarynda óńdeý kólemi 10 esege tómendedi. Bul týraly búgin Astanada Munaı jáne gaz vıtse-mınıstri Áset Maǵaýov málim etti.
«Bizdiń naryqta shaǵyn munaı óńdeý zaýyttarynyń ónimi aıtarlyqtaı joǵary emes. Ótken jylmen salystyrǵanda, shaǵyn munaı óńdeý zaýyttarynda óńdeý kólemi eleýli kólemde tómendedi. Eger byltyrǵy jyly 500 myń tonnaǵa jýyq málimdelse, al bıylǵy birinshi jartyjyldyqtyń qorytyndysy boıynsha atalǵan zaýyttarynda óńdeý kólemi 10 ese tómendedi», - dedi vıtse-mınıstr.
Á. Maǵaýovtyń sózine qaraǵanda, shaǵyn munaı óńdeý zaýyttarynyń ónimi elimiz naryǵynda taralmaıdy. Olardyń negizgi bıznesi ımporttyq munaıdy qaıta óńdep, birinshi deńgeıli óńdelgen ónimdi eksportqa shyǵarý. Sondyqtan olardyń ónimi elimiz naryǵyna shyǵarylmaı otyr. Vıtse-mınıstr búginde Qazaqstanda 27 shaǵyn munaı óńdeý zaýyttary jumys istep jatqandyǵyn jetkizdi.
