2010 jyly barlyǵy 18 myń 330 josparly jáne josparsyz tekserister júrgizildi
Bul týraly búgin 2010 jyldyń qorytyndysy men bıylǵy jyldyń mindetterine arnalǵan Eńbek jáne halyqty áleýmettik qorǵaý mınıstrliginiń alqa májilisinde atalǵan vedomstvonyń baqylaý jáne áleýmettik qorǵaý komıtetiniń tóraǵasy Serikqalı Bısaqaev málim etti.
«Qazirgi kezde Qazaqstanda tirkelgen 247 myń 947 mekeme eńbek ınspektsııasynyń esebine kirip, onda qyzmet etetin 5 mln. jýyq jaldamaly qyzmetkerlerdiń quqyqtaryn saqtaý ınspektorlardyń baqylaýyna endi. Osy sebepti jáne olardyń bergen aryzdaryndaǵy máselelerdi sheshý maqsatynda 2010 jyly barlyǵy 18 myń 330 josparly jáne josparsyz tekserister júrgizildi. Atap aıtqanda, josparly tekseris 2009 jylmen salystyrǵanda 33,5 paıyzǵa azaıdy»,-dedi komıtet tóraǵasy.
Munyń negizgi sebebi, 2010 jyldyń naýryz aıynan bastap eńbek zańnamalarynyń oryndalýy josparly baqylaý jáne táýekeldi baqylaý júıesi arqyly júrgizildi. «Jalpy, tekseris qorytyndysy boıynsha barsha mekemelerdi qosa eseptegende 71 myń 96 eńbek zańnamasyn buzýshylyq anyqtaldy. Bul kórsetkish eńbek ınspektsııasy qurylǵan 2001 jylmen salystyrsaq 40 paıyzǵa tómendegenin baıqaýǵa bolady»,-dep atap ótti S. Bısaqaev.
