2010 jyly Astana qalasynyń sottary 213 áıelge qatysty 189 qylmystyq isti qarady - Prokýratýra
ASTANA. 25 qańtar. QazAqparat /Gúlmıra Álıakparova/ - 2010 jyly Astana qalasynyń sottary 213 áıelge qatysty 189 qylmystyq isti qarady. Bul týraly qalalyq prokýratýradan málim etti.
Sonyń ishinde 163 áıeldiń qatysy bar 141 is boıynsha aıyptaý úkimderi shyqty, al 50 áıelge qatysty 48 is QR Qylmystyq Kodeksiniń (QK) 67 babyna sáıkes toqtatyldy.
Prokýratýra ókilderiniń aıtýynsha, jasalǵan qylmystardyń deni múlikti urlaý, alaıaqtyq jáne esirtkiniń zańsyz aınalymyna qatysty bolǵan.
Onymen birge, sybaılas jemqorlyq qylmystaryna qatysty qozǵalǵan 13 qylmystyq is boıynsha 15 áıel jazaǵa tartyldy.
Asa aýyr sanatqa jatatyn qylmystar boıynsha 8 azamatshaǵa qatysty - 8 is, aýyr qylmystar boıynsha 85-ine qatysty - 73, ortasha aýyr qylmys boıynsha 101 tulǵaǵa qatysty - 92 is qozǵaldy.
Sottardyń áıelderge qoldanǵan jazalaý úkimderi mynadaı: 68 tulǵa bas bostandyǵynan aıyrý jazasyna kesildi, sonyń ishinde 8-ine QR QK-niń 72-baby qoldanyldy (úkimdi shegerý). Taǵy 78 áıel - bas bostandyǵynan shartty túrde aıyryldy, 15-ine aıyppuldar salyndy. Qoǵamdyq jumystarǵa tartý jáne bostandyǵyna shekteý qoıý jazalary qoldanylǵan joq.
Elordalyq prokýratýradan naqtylaǵandaı, qalalyq sottar aıypqa tartylǵan áıelderge kóbinese, bas bostandyǵynan aıyrmaıtyn jazalar qoldanǵan. Degenmen, 68 tulǵa nemese 42,5 paıyzy temir tordyń arǵy jaǵyna jiberildi. Olar negizinen asa aýyr qylmys jasaǵandar nemese qylmysqa ekinshi ret barǵandar.
«Áıelderdiń qylmysqa barýynyń sebebi burynǵydaı, asa aýyr turmystyq jaǵdaı, materıaldyq aýyrtpalyqtar, tómen eńbekaqy, jumyssyzdyq nemese aqshaǵa ońaı jolmen kenelý áreketteri bolyp otyr. Jalpy, atalmysh sanattaǵy isterdi qaraý tájirıbesi, asa aýyr qylmys úshin sottalǵan áıelderdiń sany artyp otyrǵanyn kórsetip otyr», - atap ótti Prokýratýradan.
