2010 jyly amnıstııa jarııalaýmen birge qylmystyq is júrgizý zańnamasyna gýmanızatsııalaý turǵysynan reforma júrgizý qajet - B. Imashev
ASTANA. Aqpannyń 4-i. QazAqparat /Qanat Mámetqazyuly/ ‑ 2010 jyly amnıstııa jarııalaýmen birge qylmystyq is júrgizý zańnamasyna gýmanızatsııalaý turǵysynan reforma júrgizý qajet. Búgin QR Parlamenti Senatynyń jalpy otyrysynda QR Úkimet basshysynyń, QR Joǵarǵy Sot Tóraǵasynyń, QR Bas prokýrorynyń atyna joldaǵan depýtattyq saýalynda senator Berik Imashev osylaı málim etti,
dep habarlaıdy QazAqparat.
«Osydan biraz buryn áriptesim Ǵanı Qasymov Úkimet basshysyna elimizdegi sottalǵandarǵa qatysty amnıstııa jarııalaý máselesin kóterip, saýal joldaǵan bolatyn. Ádilet mınıstrliginiń alqa májilisinde mınıstr R. Túsipbekov te 2010 jyly amnıstııa jarııalaýdy oryndy dep, bunyń sottalǵandardy ustap turýǵa arnalǵan bıýdjetti qysqartýǵa, túzeý mekemelerindegi sottalǵandar sanyn azaıtýǵa múmkindik beretinin aıtqan edi. Degenmen, amnıstııa máselesi tek qarajatty únemdeý jáne sottalǵandar sanyn azaıtýǵa ǵana negizdelmeı, bunyń saldarymen kúresýdi de qarastyrýy shart. Osyǵan oraı, amnıstııa aktisin jarııalaýmen birge, qylmystyq is júrgizý zańnamasyna gýmanızatsııalaý turǵysynan reforma júrgizý qajet», dedi senator. Onyń aıtýynsha, amnıstııa memlekettiń qylmystyq is júrgizý saıasatynyń ózgergenin bildirip, osy saladaǵy zańnamanyń zamanaýı talaptarǵa saı bolýyn mán berýdi qolǵa alý qajet.
«1991 jyldan beri Qazaqstanda 7 márte, ıaǵnı orta eseppen alǵanda árbir 2,5 jylda bir ret raqymshylyq sharasy ótken bolatyn. Bul rette Úkimet qylmystyq jazasyn ótep shyqqandar úshin áleýmettik beıimdeý sharalaryn jetildirip, qylmystyq zańnamany gýmanızatsııalaýǵa qatysty jobalar usynýy tıis», dedi B. Imashev.
