2010 jylǵy bıýdjette Azııa oıyndaryn ótkizýdi qarjylandyrýǵa 53,2 mlrd. teńge qarastyrylyp otyr
ASTANA. Qyrkúıektiń 14-i. QazAqparat /Qanat Mámetqazyuly/ - 2010 jylǵy respýblıkalyq bıýdjette Azııa oıyndaryn ótkizýdi qarjylandyrýǵa 53,2 mlrd. teńge qarastyrylǵan. Bul týraly búgin QR Parlamenti Májilisindegi «2010-2012 jyldarǵa arnalǵan respýblıkalyq bıýdjet týraly» zań jobasynyń tanystyrylymy barysynda málim boldy,
dep habarlaıdy QazAqparat.
«2011 jyly Azııa oıyndaryn daıyndaý men ótkizýdi qarjylandyrý kózdelip otyr. Ol úshin Astana men Almaty qalalarynda sport nysandarynyń, kólik jáne energetıka ınfraqurylymdarynyń qurylysy men qaıta jańalanýy, sondaı-aq uıymdastyrý is-sharalary kózdelgen. Osy maqsattarǵa bıýdjetten 2010 jyly 53,2 mlrd. teńge, 2011 jyly 10,5 mlrd. teńge qarastyryldy, dedi Ekonomıka jáne bıýdjettik josparlaý mınıstri Baqyt Sultanov.
Atap aıtqanda, kelesi jylǵy bıýdjetten Almaty oblysynda shańǵy jáne bıatlon stadıonyn salýǵa 7 mlrd. teńge, konkı tebý stadıonynyń qurylysyna 2,8 mlrd. teńge josparlanǵan. Budan basqa Azııa oıyndaryn uıymdastyrý men ótkizý sharalaryna daıyndyq jumystary úshin 12,2 mlrd. teńge kózdelip otyr.
«Jalpy bıýdjet jobasynda sportshylar men jattyqtyrýshylarǵa materıaldyq tólemderdi 8 aılyq eseptik kórsetkishten 24 aılyq eseptik kórsetkishke deıin ulǵaıtý josparlandy. Bul «Dene shynyqtyrý jáne sport týraly» zańǵa engizilgen ózgerister boıynsha júzege asady. Atalǵan sanatqa respýblıkanyń jáne burynǵy KSRO qurama komandalarynyń quramynda Olımpıada oıyndaryna qatysqan jattyqtyrýshylar engiziledi», dedi B. Sultanov.
